DMart Bill Secret: देशभरातील लाखो ग्राहक खरेदीसाठी डी मार्टला (DMart) पसंती देतात. कमी दर, आकर्षक ऑफर्स आणि एकाच ठिकाणी सर्व घरगुती वस्तू उपलब्ध असल्यामुळे डी मार्टमध्ये नेहमीच ग्राहकांची गर्दी असते. मात्र, खरेदी केल्यानंतर बिलावर पेनाने मारल्या जाणाऱ्या तीन तिरक्या रेषा आणि वर लिहिलेला एक आकडा अनेकांच्या नजरेतून जातो. या चिन्हांचा नेमका अर्थ काय असतो, हे फार कमी लोकांना माहिती असते.
खरेदी पूर्ण करून ग्राहक बिलासह बाहेर पडत असताना एक्झिट गेटवर सुरक्षा कर्मचारी बिलाची आणि सामानाची तपासणी करतात. तपासणी पूर्ण झाल्यानंतर बिलावर तीन तिरक्या रेषा मारल्या जातात. याचा अर्थ ग्राहकाच्या ट्रॉली किंवा पिशव्यांमधील सर्व वस्तू बिलाशी जुळवून तपासण्यात आल्या असून तपासणी पूर्ण झाली आहे.
यामुळे चुकीने एखादी वस्तू बिलाशिवाय बाहेर जाणे, किंवा बिलातील वस्तू कमी-जास्त होणे अशा प्रकारांना आळा बसतो. ही प्रक्रिया ग्राहक आणि स्टोअर या दोघांच्या सुरक्षिततेसाठी केली जाते.
याशिवाय बिलाच्या वरच्या भागात पेनाने लिहिलेला आकडा देखील महत्त्वाचा असतो. हा आकडा ग्राहकाकडे असलेल्या एकूण पिशव्यांची (Bags) संख्या दर्शवतो. उदाहरणार्थ, ग्राहकाकडे दोन पिशव्या असतील तर बिलावर 2 असा आकडा लिहिला जातो. त्यामुळे सुरक्षा रक्षकाला बिलावरील संख्या आणि प्रत्यक्ष पिशव्या सहज तपासता येतात.
डी मार्टमध्ये सेल्फ-सर्व्हिस पद्धतीने ग्राहक स्वतः वस्तू निवडतात. त्यामुळे मोठ्या प्रमाणावर होणाऱ्या खरेदीमध्ये कोणताही गोंधळ होऊ नये आणि सुरक्षा व्यवस्थाही मजबूत राहावी, यासाठी ही प्रणाली वापरली जाते.
पुढच्या वेळी डी मार्टमध्ये खरेदी करताना बिलावर दिसणाऱ्या तीन तिरक्या रेषा आणि आकडा पाहिल्यास त्यामागील कारण तुम्हाला नक्कीच समजलेले असेल.
