ऐतिहासिक राजमाची किल्ल्यावर एकजूट टीमचा रोमांचक ट्रेक; इतिहास, निसर्ग आणि साहसाचा अविस्मरणीय संगम
गौरव प्रकाशन न्यूज
अमरावती/प्रतिनिधी : सह्याद्रीच्या निसर्गरम्य पर्वतरांगांमध्ये वसलेला ऐतिहासिक राजमाची किल्ला ट्रेकर्स आणि निसर्गप्रेमींसाठी नेहमीच आकर्षणाचा केंद्रबिंदू राहिला आहे. सुमारे 2710 फूट उंचीवरील हा किल्ला सातवाहनकालीन इतिहासाची साक्ष देणारा असून 1657 मध्ये छत्रपती शिवाजी महाराजांनी तो स्वराज्यात सामील करून घेतला होता.
इतिहास, निसर्ग आणि साहसाचा अनोखा अनुभव घेण्यासाठी एकजूट लेणी अभ्यास प्रचारक समूह (महाराष्ट्र राज्य) यांच्या वतीने शनिवार, 6 जून 2026 रोजी विशेष ट्रेक दौऱ्याचे आयोजन करण्यात आले होते. पुणे आणि मुंबई येथील सदस्य उधेवाडी येथे एकत्र आले. सातवाहनकालीन मंदिर परिसरातील घनदाट जंगलात मुक्कामासाठी टेन्ट उभारण्यात आले होते.
पहाटेच्या आल्हाददायक वातावरणात सर्व सदस्यांनी राजमाची किल्ल्याकडे प्रस्थान केले. किल्ल्याच्या चढाईदरम्यान सहभागींचा उत्साह ओसंडून वाहत होता. याच वेळी 7 जून हा धम्म लिपी शिक्षक सुरजजी सोनकांबळे यांचा वाढदिवस असल्याने उपस्थितांनी त्यांना शुभेच्छा देत आनंद व्यक्त केला.
किल्ल्याच्या परिसरातील ऐतिहासिक वास्तू, तटबंदी आणि निसर्गसौंदर्याचा अनुभव घेताना सहभागी इतिहासाच्या पाऊलखुणा शोधत होते. तत्कालीन राजकीय, सामाजिक आणि सांस्कृतिक परिस्थितीवर चर्चाही रंगल्या. दौऱ्यादरम्यान एकजूट टीमचे मार्गदर्शक सारिशजी डोळस (दादूस सर) यांनी राजमाची किल्ल्याचा इतिहास, वैशिष्ट्ये आणि पुरातत्त्वीय महत्त्व याबाबत सविस्तर माहिती दिली.
लोणावळा ते उधेवाडी हा सुमारे 16 किलोमीटरचा कच्चा मार्ग आणि परिसरातील निसर्गरम्य वातावरणामुळे हा ट्रेक सहभागींसाठी अविस्मरणीय ठरला. किल्ला दर्शनानंतर सर्व सदस्यांनी उधेवाडी येथे भोजन करून आपल्या-आपल्या गावी परतीचा प्रवास केला.
इतिहासाची ओळख, निसर्गाशी जवळीक आणि साहसाचा थरार अनुभवत संपन्न झालेला हा राजमाची ट्रेक सहभागींच्या स्मरणात कायम राहणार असल्याची भावना यावेळी व्यक्त करण्यात आली.
