मुंबई : लोकप्रिय मालिका Taarak Mehta Ka Ooltah Chashmah मधील ‘बाघा’ या भूमिकेमुळे घराघरात पोहोचलेले तन्मय वेकरिया यांच्यावर पुन्हा एकदा दुःखाचा डोंगर कोसळला आहे. आईच्या निधनाच्या आठवणींनी काही दिवसांपूर्वी भावूक झालेल्या तन्मय यांना आता आणखी एक मोठा धक्का बसला आहे. त्यांचे वडील आणि ज्येष्ठ गुजराती अभिनेते-दिग्दर्शक अरविंद वेकरिया यांचे निधन झाले आहे.
अरविंद वेकरिया हे गुजराती रंगभूमीवरील एक प्रतिष्ठित नाव मानले जात होते. अभिनय आणि दिग्दर्शन क्षेत्रात त्यांनी मोठे योगदान दिले होते. त्यांच्या निधनामुळे गुजराती कला आणि मनोरंजन विश्वात शोककळा पसरली आहे.
विशेष म्हणजे, काही दिवसांपूर्वी तन्मय वेकरिया शूटिंगदरम्यान आपल्या दिवंगत आईच्या आठवणीने भावूक झाले होते. त्यावेळी त्यांचा अश्रू अनावर झाल्याचा व्हिडिओ सोशल मीडियावर व्हायरल झाला होता. आता वडिलांच्या निधनाने त्यांच्या दुःखात आणखी भर पडली आहे.
तन्मय वेकरिया यांचे चाहते आणि मनोरंजन क्षेत्रातील अनेक कलाकार सोशल मीडियाच्या माध्यमातून त्यांना श्रद्धांजली अर्पण करत असून वेकरिया कुटुंबीयांप्रती संवेदना व्यक्त करत आहेत.
