दाक्षिणात्य चित्रपटसृष्टी आणि आयपीएल विश्वातील सर्वात चर्चित जोडींपैकी एक असलेल्या काव्या मारन आणि अनिरुद्ध रविचंदर यांच्या लग्नाच्या चर्चांना आता मोठे बळ मिळाले आहे. अनेक महिन्यांपासून सुरू असलेल्या अफवांवर आता अनिरुद्धचे मामा आणि अभिनेते वाय. जी. महेंद्रन यांनी शिक्कामोर्तब केल्याने या चर्चांना नवे वळण मिळाले आहे.
आयपीएलमधील सनरायझर्स हैदराबाद (SRH) संघाची मालकीण म्हणून ओळखली जाणारी काव्या मारन लवकरच सुपरस्टार रजनीकांत यांच्या कुटुंबाची सून होणार असल्याची चर्चा जोर धरू लागली आहे.
मामाकडून लग्नाला दुजोरा
केपी टीव्हीवरील ‘कुट्टी पद्मिनी’ या कार्यक्रमात बोलताना वाय. जी. महेंद्रन यांनी अनिरुद्धच्या लग्नाविषयी महत्त्वाचा खुलासा केला. त्यांनी सांगितले की, अनिरुद्धचे लग्न निश्चित झाले असून हा सोहळा मोठ्या थाटामाटात पार पडणार आहे. त्यांच्या या वक्तव्यानंतर काव्या मारन आणि अनिरुद्ध यांच्या नात्यावरील चर्चांना अधिकृत स्वरूप मिळाल्याचे मानले जात आहे.
अनेक दिवसांपासून सुरू होत्या प्रेमाच्या चर्चा
गेल्या एक-दोन वर्षांपासून अनिरुद्ध रविचंदर आणि काव्या मारन एकमेकांना डेट करत असल्याच्या चर्चा सुरू होत्या. 2025 मध्ये लास वेगासमध्ये दोघे एकत्र दिसल्यानंतर या चर्चांना अधिक उधाण आले होते. त्यानंतर लग्नाच्या बातम्यांनी सोशल मीडियावरही जोरदार चर्चा रंगवली होती.
काव्या मारन कोण आहेत?
काव्या मारन या सन ग्रुपचे चेअरमन कलानिधी मारन यांच्या कन्या आहेत. आयपीएलमध्ये सनरायझर्स हैदराबाद संघाचे व्यवस्थापन पाहताना त्या अनेकदा स्टेडियममध्ये दिसतात. त्यांच्या साधेपणा, आत्मविश्वास आणि क्रिकेटप्रेमामुळे त्या चाहत्यांमध्ये विशेष लोकप्रिय आहेत.
अनिरुद्ध रविचंदरची दमदार कारकीर्द
35 वर्षीय अनिरुद्ध रविचंदर हा दक्षिण भारतीय चित्रपटसृष्टीतील सर्वाधिक लोकप्रिय संगीतकार आणि गायकांपैकी एक आहे. त्याने रजनीकांत, कमल हासन, थलपती विजय, ज्युनियर एनटीआर तसेच शाहरुख खान यांच्या चित्रपटांसाठी सुपरहिट संगीत दिले आहे. विशेष म्हणजे रजनीकांत यांच्या पत्नी लता या अनिरुद्धच्या मावशी असल्याने तो आधीपासूनच त्यांच्या नात्यातील आहे.
नोव्हेंबर-डिसेंबरमध्ये होऊ शकते लग्न
मिळालेल्या माहितीनुसार, काव्या मारन आणि अनिरुद्ध रविचंदर यांचे लग्न यावर्षी नोव्हेंबर किंवा डिसेंबर महिन्यात होण्याची शक्यता आहे. हा विवाह डेस्टिनेशन वेडिंग स्वरूपात होईल, तर त्यानंतर चेन्नईमध्ये भव्य स्वागत समारंभ आयोजित केला जाऊ शकतो. मात्र, अद्याप अधिकृत तारीख जाहीर करण्यात आलेली नाही.
दोघांकडून अधिकृत घोषणा अद्याप झालेली नसली तरी मामाच्या वक्तव्यानंतर या चर्चांना मोठी विश्वसनीयता मिळाली असून चाहते आता अधिकृत घोषणेची उत्सुकतेने वाट पाहत आहेत.
