बेळगाव | प्रतिनिधी
धावत्या बसमधून गुटखा थुंकण्यासाठी डोकं बाहेर काढणं एका 17 वर्षीय विद्यार्थ्याच्या जीवावर बेतलं. कर्नाटकातील धारवाड जिल्ह्यातील कुंदगोळ परिसरात झालेल्या या भीषण अपघातात आयटीआय शिकणाऱ्या विद्यार्थ्याचा जागीच मृत्यू झाला. या घटनेमुळे परिसरात हळहळ व्यक्त होत आहे.
मृत विद्यार्थ्याची ओळख फक्कीरेश चन्नय्या मुत्तळीमठ (वय 17, रा. शिरूर) अशी झाली आहे. तो आयटीआयमध्ये शिक्षण घेत होता. लक्ष्मेश्वर डेपोची केएसआरटीसी बस प्रवाशांना घेऊन जात असताना हा दुर्दैवी अपघात घडला.
प्राथमिक माहितीनुसार, बसच्या बाजूने वाळूने भरलेली लॉरी ओव्हरटेक करत होती. त्याचवेळी फक्कीरेशने गुटखा थुंकण्यासाठी बसच्या खिडकीतून डोकं बाहेर काढलं. याच क्षणी त्याच्या डोक्याला लॉरीची जोरदार धडक बसली. धडक इतकी भीषण होती की त्याचा घटनास्थळीच मृत्यू झाला.
घटनेची माहिती मिळताच कुंदगोळ पोलिसांनी तातडीने घटनास्थळी धाव घेत पंचनामा केला. मृतदेह शवविच्छेदनासाठी रुग्णालयात पाठवण्यात आला असून अपघाताचा पुढील तपास सुरू आहे.
या दुर्घटनेनंतर विद्यार्थ्याच्या कुटुंबावर दुःखाचा डोंगर कोसळला आहे. तसेच, धावत्या वाहनातून हात, डोकं किंवा शरीराचा कोणताही भाग बाहेर काढणे किती धोकादायक ठरू शकते, याची पुन्हा एकदा जाणीव या घटनेतून झाली आहे.
