अमरावती, १२ ऑगस्ट २०२६ : देशभक्तीच्या घोषणांनी दुमदुमलेले शहर, हातात डौलाने फडकणारा तिरंगा आणि हजारो नागरिकांचा उत्स्फूर्त सहभाग… अशा उत्साहपूर्ण वातावरणात अमरावती महानगरपालिकेच्या वतीने ‘हर घर तिरंगा’ अभियानांतर्गत भव्य तिरंगा रॅली काढण्यात आली. या रॅलीमुळे संपूर्ण अमरावती शहर तिरंगामय झाले.
स्वातंत्र्यदिनाच्या पार्श्वभूमीवर नागरिकांमध्ये राष्ट्रध्वजाबद्दल आदर, अभिमान आणि आत्मीयता निर्माण करण्याच्या उद्देशाने या रॅलीचे आयोजन करण्यात आले होते. बुधवारी दुपारी ४ वाजता नेहरू मैदान येथून मान्यवरांच्या हस्ते हिरवा झेंडा दाखवून रॅलीला सुरुवात झाली.
राजकमल चौक ते इर्विन चौकापर्यंत तिरंग्याची लाट
नेहरू मैदानातून सुरू झालेली तिरंगा रॅली राजकमल चौक, जयस्तंभ चौक, मालवीय चौक आणि इर्विन चौक मार्गे मार्गक्रमण करत संत ज्ञानेश्वर सांस्कृतिक भवन येथे पोहोचली.
रॅलीमध्ये हजारो अमरावतीकरांसह महापालिकेचे अधिकारी-कर्मचारी, लोकप्रतिनिधी, व्यापारी, शाळा-महाविद्यालयांतील विद्यार्थी, स्वयंसेवी संस्था आणि विविध सामाजिक संघटनांचे प्रतिनिधी सहभागी झाले.
हातात तिरंगा घेऊन देशभक्तीच्या घोषणांनी भारावलेल्या वातावरणात नागरिकांनी राष्ट्रप्रेमाचा संदेश दिला.
महात्मा गांधी आणि डॉ. बाबासाहेब आंबेडकरांना अभिवादन
रॅलीदरम्यान जयस्तंभ चौक येथे राष्ट्रपिता महात्मा गांधी यांच्या पुतळ्यास पुष्पहार अर्पण करून अभिवादन करण्यात आले. त्यानंतर इर्विन चौक येथे विश्वरत्न डॉ. बाबासाहेब आंबेडकर यांच्या पुतळ्यास पुष्पहार अर्पण करून अभिवादन करण्यात आले.
यामुळे रॅलीला देशभक्तीबरोबरच सामाजिक एकात्मता आणि राष्ट्रीय ऐक्याचा संदेश मिळाला.
विद्यार्थ्यांचा उत्स्फूर्त सहभाग
तिरंगा रॅलीमध्ये विविध शाळा-महाविद्यालयांतील विद्यार्थ्यांनी मोठ्या उत्साहाने सहभाग घेतला. विद्यार्थ्यांच्या हातातील असंख्य तिरंगे आणि देशभक्तीच्या घोषणांमुळे रॅलीचे वातावरण अधिकच उत्साहपूर्ण झाले.
विविध शाळांमधील विद्यार्थ्यांनी देशभक्तीपर नृत्य सादर करून उपस्थितांची दाद मिळवली.
तिरंगा प्रतिज्ञा आणि अवयवदानाची शपथ
या कार्यक्रमादरम्यान उपस्थितांनी तिरंगा प्रतिज्ञा तसेच अवयवदानाची शपथ घेतली. त्यामुळे ‘हर घर तिरंगा’ अभियानाला सामाजिक बांधिलकीची जोड मिळाली.
रॅलीच्या समारोपावेळी रंगीबेरंगी तिरंगा फुगे आकाशात सोडण्यात आले. या दृश्याने उपस्थितांमध्ये देशभक्तीचा उत्साह आणखी वाढला.
महापौर श्रीचंद तेजवानी यांचे आवाहन
यावेळी महापौर श्रीचंद तेजवानी यांनी अमरावतीकरांना ‘हर घर तिरंगा’ अभियानात उत्स्फूर्तपणे सहभागी होण्याचे आवाहन केले.
तिरंगा हा केवळ राष्ट्रध्वज नसून तो भारताच्या स्वातंत्र्याचा, राष्ट्रीय एकात्मतेचा आणि अभिमानाचा प्रतीक असल्याचे त्यांनी सांगितले. प्रत्येक नागरिकाने आपल्या घरावर सन्मानपूर्वक तिरंगा फडकवून देशप्रेमाची भावना व्यक्त करावी, असे आवाहन त्यांनी केले.
तसेच घर, कार्यालये, दुकाने आणि संस्थांवर तिरंगा फडकवताना राष्ट्रध्वजाच्या सन्मानाचे नियम पाळण्याचे आवाहनही त्यांनी केले.
आयुक्त डॉ. मंगेश गोंदावले यांनीही केले आवाहन
महानगरपालिका आयुक्त डॉ. मंगेश गोंदावले यांनी उपस्थितांना संबोधित करताना ‘हर घर तिरंगा’ ही केवळ मोहीम नसून राष्ट्रध्वजाबद्दलचे प्रेम, निष्ठा आणि अभिमान व्यक्त करण्याची संधी असल्याचे सांगितले.
आजची रॅली ही केवळ मिरवणूक नसून देशप्रेमाची अभिव्यक्ती, एकतेचा संदेश आणि राष्ट्रभक्तीचा सजीव उत्सव असल्याचे त्यांनी नमूद केले.
प्रत्येक अमरावतीकराने आपल्या घरावर तिरंगा फडकवून कुटुंब आणि समाजामध्ये देशप्रेमाची भावना रुजवावी, असे आवाहन त्यांनी केले. तिरंगा हा शूर जवानांचा अभिमान, शेतकऱ्याचा घाम आणि प्रत्येक नागरिकाच्या आशेचे प्रतीक असल्याचेही त्यांनी सांगितले.
मान्यवरांची उपस्थिती
या रॅलीला महापौर श्रीचंद तेजवानी, आयुक्त डॉ. मंगेश गोंदावले, उपमहापौर सचिन भेंडे, स्थायी समिती सभापती अविनाश मार्डीकर, सभागृह नेता चेतन गावंडे, विविध गटनेते, झोन सभापती, समिती सभापती व उपसभापती, नगरसेवक-नगरसेविका, महापालिका व पोलीस विभागाचे अधिकारी-कर्मचारी, विद्यार्थी तसेच विविध सामाजिक संघटनांचे प्रतिनिधी उपस्थित होते.
रॅलीच्या यशस्वी आयोजनाबद्दल उपस्थित मान्यवरांनी सहभागी नागरिक, शाळा-महाविद्यालयांचे प्रतिनिधी, सामाजिक संस्था, अधिकारी आणि कर्मचाऱ्यांचे अभिनंदन व आभार मानले.
विविध विभागांचे विशेष योगदान
रॅलीच्या यशस्वी आयोजनासाठी बांधकाम विभाग, शिक्षण विभाग, बाजार व परवाना विभाग तसेच अग्निशमन विभागाचे विशेष योगदान लाभले. रॅलीच्या नियोजनापासून प्रत्यक्ष अंमलबजावणीपर्यंत संबंधित विभागांनी महत्त्वाची भूमिका बजावली.
अमरावतीतील या भव्य तिरंगा रॅलीतून ‘प्रत्येक घरावर तिरंगा आणि प्रत्येक हृदयात भारताचा अभिमान’ हा संदेश देण्यात आला. हजारो नागरिकांच्या सहभागामुळे ‘हर घर तिरंगा’ अभियानाला अमरावतीत उत्स्फूर्त प्रतिसाद मिळाल्याचे चित्र पाहायला मिळाले.
