नवी दिल्ली : राजधानी दिल्लीतील जगतपुरी परिसरात कौटुंबिक वादाचे भीषण रूप समोर आले आहे. मोबाईल तपासण्यावरून झालेल्या वादातून एका २० वर्षीय पत्नीने आपल्या पतीचा ओढणीने गळा आवळून खून केल्याची धक्कादायक घटना घडली. या प्रकरणामुळे परिसरात एकच खळबळ उडाली असून पोलिसांनी आरोपी पत्नीला अटक केली आहे.
पोलिसांनी दिलेल्या माहितीनुसार, जगतपुरीतील रशीद मार्केट परिसरात राहणारे मुस्तकीम उर्फ साहिल आणि त्याची पत्नी अलीशा यांच्यात गेल्या काही दिवसांपासून वारंवार वाद होत होते. पतीला पत्नीच्या चारित्र्यावर संशय असल्याने घरात सतत तणावाचे वातावरण होते.
बुधवारी मध्यरात्री मुस्तकीमने पत्नीचा मोबाईल तपासला. कॉल रेकॉर्ड आणि इतर माहिती पाहिल्यानंतर दोघांमध्ये जोरदार वाद झाला. वाद इतका वाढला की त्याचे रूपांतर हाणामारीत झाले.
चौकशीदरम्यान अलीशाने पोलिसांना सांगितले की, पतीने तिला मारहाण केली होती. त्यानंतर संतापाच्या भरात तिने पतीला खाली पाडले, त्याच्या छातीवर बसून ओढणीने गळा आवळला. काही वेळातच मुस्तकीम बेशुद्ध पडला.
आरडाओरडा ऐकून मुस्तकीमची आई खोलीत आली. मुलाची गंभीर अवस्था पाहताच तिने मदतीसाठी हाक मारली. कुटुंबीयांनी त्याला तातडीने रुग्णालयात नेले. मात्र डॉक्टरांनी तपासणीनंतर त्याला मृत घोषित केले.
घटनेनंतर आरोपी अलीशा घटनास्थळावरून फरार झाली होती. पोलिसांनी विशेष पथक तयार करून शोधमोहीम सुरू केली. अखेर गुरुद्वाराजवळ लपून बसलेल्या अलीशाला अटक करण्यात आली. सध्या तिची चौकशी सुरू असून जगतपुरी पोलीस या प्रकरणाचा अधिक तपास करत आहेत.
