मराठमोळ्या स्टाईलने संपूर्ण देशाला वेड लावणारा लोकप्रिय गायक संजू राठोड आता थेट बॉलीवूडमध्ये दमदार एन्ट्री करण्यासाठी सज्ज झाला आहे. २०२४ मध्ये सोशल मीडियावर अक्षरशः धुमाकूळ घालणाऱ्या त्याच्या सुपरहिट ‘गुलाबी साडी’ गाण्याचे हिंदी व्हर्जन आता प्रेक्षकांच्या भेटीला येत आहे. विशेष म्हणजे हे गाणे आगामी बहुचर्चित बॉलीवूड चित्रपट ‘धमाल ४’मध्ये पाहायला मिळणार आहे.
संजू राठोडने नुकताच सोशल मीडियावर ‘गुलाबी रंग’ या हिंदी गाण्याचा धमाकेदार टीझर रिलीज केला असून, चाहत्यांमध्ये प्रचंड उत्सुकता निर्माण झाली आहे. या गाण्यात अभिनेता रितेश देशमुख आणि अभिनेत्री अंजली आनंद जबरदस्त डान्स करताना दिसत आहेत. अंजली आनंदने गुलाबी रंगाची साडी नेसून मराठमोळा अंदाज साकारला आहे, तर रितेश देशमुखने पांढऱ्या रंगाचा स्टायलिश लूक कॅरी केला आहे.
विशेष म्हणजे या गाण्यात स्वतः संजू राठोडदेखील झळकणार असून, त्याची एनर्जी आणि हटके स्टाईल पुन्हा एकदा चाहत्यांना वेड लावताना दिसणार आहे. ‘गुलाबी साडी’ या गाण्याने सोशल मीडियावर अनेक विक्रम मोडले होते. मराठीसह हिंदी सिनेसृष्टीतील कलाकारांनी या गाण्यावर हजारो रील्स तयार केल्या होत्या. इंस्टाग्राम, यूट्यूब आणि फेसबुकवर या गाण्याची मोठी क्रेझ पाहायला मिळाली होती.
आता ‘गुलाबी रंग’ या हिंदी व्हर्जनमुळे संजू राठोडची लोकप्रियता आणखी वाढणार असल्याचे बोलले जात आहे. ‘धमाल ४’सारख्या मोठ्या बॉलीवूड चित्रपटातून संजूची एन्ट्री होत असल्याने चाहत्यांमध्ये उत्साहाचे वातावरण आहे. टीझर रिलीज होताच सोशल मीडियावर चाहत्यांनी कमेंट्स आणि लाईक्सचा अक्षरशः पाऊस पाडला आहे.
सध्या ‘गुलाबी रंग’ हे गाणे सोशल मीडियावर तुफान व्हायरल होत असून, येत्या काही दिवसांत हे गाणे मोठा रेकॉर्ड करू शकते, अशी चर्चा रंगली आहे.
