गौरव प्रकाशन शिर्डी | प्रतिनिधी
प्रवरा ग्रामीण शिक्षण संस्थेतील सेवानिवृत्त शिक्षक आणि ज्येष्ठ साहित्यिक प्रा. दादासाहेब कोते यांच्या साहित्यिक कारकिर्दीत आणखी एक मानाचा तुरा खोवला गेला आहे. नव्या शैक्षणिक धोरणानुसार तयार करण्यात आलेल्या अमराठी माध्यमाच्या “दोस्ती करूया मराठीशी” या इयत्ता चौथीच्या मराठी विषयाच्या पाठ्यपुस्तकात त्यांच्या “फुलपाखरू” या कवितेचा समावेश करण्यात आला आहे.
प्रा. दादासाहेब कोते यांनी लोणी येथील प्रवरा ग्रामीण शिक्षण संस्थेच्या पद्मश्री विखे पाटील महाविद्यालयात मराठी विषयाचे प्राध्यापक म्हणून दीर्घकाळ सेवा बजावली आहे. तसेच त्यांनी भाषा विभाग प्रमुख म्हणूनही उल्लेखनीय कार्य केले आहे.
त्यांचे साहित्यिक योगदान विशेष उल्लेखनीय मानले जाते. त्यांच्या “चंद्रगाणी” आणि “फुला मुलांच्या कविता” हे दोन काव्यसंग्रह प्रकाशित झाले असून वाचकांच्या पसंतीस उतरले आहेत. याशिवाय “मॉडर्न मराठी पोएट्री” खंड सहामध्ये त्यांच्या एका कवितेचा इंग्रजी अनुवाद समाविष्ट करण्यात आला आहे. तसेच “शतकाची बालकविता” आणि “निवडक किशोर” या संपादित काव्यग्रंथांमध्येही त्यांच्या कवितांना स्थान मिळाले आहे.
यापूर्वी नव्या शैक्षणिक धोरणानुसार तयार करण्यात आलेल्या बालभारतीच्या इयत्ता पहिलीच्या पाठ्यपुस्तकात “भोपळा”, इयत्ता दुसरीच्या सुलभ भारतीमध्ये “फुलपाखरू” आणि इयत्ता तिसरीच्या सुलभ भारतीमध्ये “झोका” या कवितांचा समावेश करण्यात आला होता.
विशेष म्हणजे, इयत्ता पहिली ते इयत्ता चौथी अशा सलग चार इयत्तांच्या मराठी पाठ्यपुस्तकांमध्ये कविता समाविष्ट होण्याचा मान मिळविणारे प्रा. दादासाहेब कोते हे दुर्मिळ उदाहरण ठरले आहेत. त्यांच्या या उल्लेखनीय साहित्यिक यशाबद्दल साहित्य, शिक्षण आणि सामाजिक क्षेत्रातून त्यांच्यावर अभिनंदनाचा वर्षाव होत आहे.
