सोलापूर धम्मसंगीतीत मोठा निर्णय | बौद्ध संस्कारांमध्ये एकसूत्रतेची मागणी
सोलापूर | प्रतिनिधी
सोलापूर येथे आयोजित सहावी धम्मसंगीती यशस्वीरित्या संपन्न झाली. बौद्ध धम्म हा लोककल्याणकारी असून बौद्ध संस्कार विधींमध्ये साधेपणा, समानता आणि एकसूत्रता असावी, तसेच विधींमध्ये आलेले भांडवलीकरण टाळले पाहिजे, असे प्रतिपादन उद्घाटक डॉ. रविंद्र मुन्द्रे यांनी केले.
रविवार, ७ जून २०२६ रोजी वेळुवण बुद्ध विहार, शिक्षक हाउसिंग सोसायटी, दक्षिण सदर बाजार, सोलापूर येथे ही धम्मसंगीती पार पडली. बौद्ध समाजातील विविध संघटनांच्या सहभागातून आयोजित या कार्यक्रमाचे संचालन अध्यक्षीय मंडळाच्या मार्गदर्शनाखाली करण्यात आले.
अध्यक्ष मंडळात भिक्खुणी धम्मचारिनी, देहू रोड येथील ऐतिहासिक धम्मभूमीचे अध्यक्ष भीमपुत्र टेक्सासदादा गायकवाड, नागपूर बुद्ध विहार समन्वय समितीचे अध्यक्ष अशोक सरस्वती बौद्ध, संभाजीनगरचे प्रा. भारत शिरसाट, कोल्हापूरचे बापूसाहेब राजहंस आणि आनंदा कांबळे यांचा समावेश होता.
कार्यक्रमाची सुरुवात अशोक सरस्वती बौद्ध यांच्या हस्ते पंचशील ध्वजारोहणाने झाली. प्रा. विजय झुंमरे यांनी त्रिसरण पंचशील दिले. मुख्य निमंत्रक डॉ. कीर्तिपाल गायकवाड यांनी प्रास्ताविक केले.
धम्मसंगीतीमध्ये तीन महत्त्वाच्या विषयांवर सखोल चर्चा करण्यात आली. यामध्ये बौद्ध संस्कार विधींमध्ये एकसूत्रता, बौद्ध सणांची निश्चिती आणि व्यवहारातील ब्राह्मणी शब्दांऐवजी स्वतंत्र बौद्ध शब्दावली निर्माण करण्याची आवश्यकता या विषयांचा समावेश होता.
या चर्चासत्रांमध्ये भीमपुत्र टेक्सास गायकवाड, राहुल खांडेकर, अशोक सरस्वती बौद्ध, प्रा. भारत शिरसाट, प्रा. विजय झुंमरे आणि बापूसाहेब राजहंस यांनी मार्गदर्शन केले.
या धम्मसंगीतीत राज्यभरातील शंभराहून अधिक प्रतिनिधी सहभागी झाले होते. कार्यक्रमाच्या शेवटी डॉ. कीर्तिपाल गायकवाड यांनी उपस्थितांचे आभार मानले.