शब्दाचं महत्त्व
शब्द गुंफताना। शब्दांना द्या मान।
शब्द मोल जाण। यशवंत ॥१॥
शब्दांचे महत्त्व। ऐकावे जनांनी।
सकलं संतांनी । सांगितले ॥२॥
संत कबीरजी। एक शब्द घाव।
औषधांचे नाव। दुजा शब्द ॥३॥
संत तुकाराम। शब्द हेच रत्न।
शब्द हेच धन । थोर तत्त्व ॥४॥
जन उपदेश। गाडगे बाबांचा।
मेळ हा शब्दांचा। कीर्तनात॥५॥
थोर राष्ट्रसंत। विकास ग्रामात।
शब्दा नी शब्दात। ग्रामगीता ॥६॥
स्वातंत्र्य देवीला। करितो नमन।
करांनी वंदन। शब्दांनीच ॥७॥
आनंदी जीवन। फुलते शब्दात।
जीवनाची वात। पेटवितो॥८॥
महान पुरुष। शब्दांनी घडले।
शब्दांनीच केले। जागृतही॥९॥
शब्दांनी करितो। थोरांना नमन।
करांनी वंदन। कोटी कोटी॥१०॥
संत कबीर राज्यस्तरीय कविराज पुरस्कार प्राप्त
अभंगकार
– प्रा .अरुण बाबारावजी बुंदेले ,
रुक्मिणी नगर,अमरावती.
भ्र .ध्व .८०८७७४८६०९
