जा गा पंढरीशी

जा गा पंढरीशी

चला चला पंढरीशी
गाऊ विठ्ठल विठ्ठल
चंद्रभागे न्हावू सुखे
टाकू वाळवंटी पाल

भीमेतीरी भक्तीरस
वैष्णवांची होय दाटी
वारकरी आसुसले
विठ्ठलाचे भेटीसाठी

विठ्ठल विठ्ठल नाद
टाळ मृदंग काढती
एकतारी चिपळ्याही
सारे विठ्ठल गर्जती

सान थोर भेद नाही
स्पृश्यास्पृश्य नाही भाव
पाया लागे एकमेका
मुखी विठ्ठलाचे नाव

नामदेव पायरीशी
धन्य झाले माझे पाय
समचरण पाहता
भासे विठ्ठलची माय

आता नाही उठाठेव
आता नाही दुजा देव
भाव पंढरीशी माझा
एक विठ्ठलची देव

–आबासाहेब कडू
(१६-७-२४)