देवीलाल रौराळे यांना ‘विश्वबंधुता प्रकाशदूत पुरस्कार’ जाहीर
गौरव प्रकाशन न्यूज अमरावती | प्रतिनिधी : अमरावतीतील प्रसिद्ध गझलकार, चित्रकार आणि सामाजिक कार्यकर्ते देवीलाल रौराळे यांना विश्वबंधुता साहित्य परिषद, पुणे तर्फे दिला जाणारा प्रतिष्ठेचा ‘विश्वबंधुता प्रकाशदूत पुरस्कार’ जाहीर करण्यात आला आहे.
हा पुरस्कार येत्या २ जून रोजी पुणे येथील एस. एम. जोशी सभागृह, गांजवे चौक, नविपेठ येथे आयोजित भव्य विश्वबंधुता कवी संमेलन, पुस्तक प्रकाशन व पुरस्कार वितरण सोहळ्यात मान्यवरांच्या हस्ते प्रदान करण्यात येणार आहे.
देवीलाल रौराळे हे अमरावतीचे बहुआयामी व्यक्तिमत्त्व म्हणून ओळखले जातात. ते राईटवे फाउंडेशनचे अध्यक्ष असून सामाजिक, साहित्यिक तसेच व्यसनमुक्ती चळवळीमध्ये सक्रियपणे कार्यरत आहेत. गझल लेखनासोबतच उत्कृष्ट चित्रकार म्हणूनही त्यांनी स्वतःची वेगळी ओळख निर्माण केली आहे. तसेच ‘देवीलाल पब्लिसिटी’चे संचालक म्हणून जाहिरात क्षेत्रातही त्यांचे उल्लेखनीय कार्य आहे.
हा पुरस्कार सोहळा विश्वबंधुता साहित्य परिषद, काषाय प्रकाशन आणि विश्वबंधुता मूल्य संवर्धन समिती यांच्या संयुक्त विद्यमाने आयोजित करण्यात आला आहे. बंधुताचार्य प्रकाशदादा रोकडे यांच्या सत्तरी पदार्पणानिमित्त हा विशेष पुरस्कार प्रदान केला जात आहे.
या काव्य संमेलनाचे अध्यक्ष म्हणून कविवर्य चंद्रकांत वानखडे उपस्थित राहणार असून स्वागताध्यक्ष म्हणून प्राचार्य डॉ. अरुण आंधळे कार्यभार सांभाळणार आहेत. तसेच प्रमुख उपस्थितीत ॲड. प्रार्थना सदावर्ते, डॉ. वसंत बुगडे, डॉ. अशोककुमार पगाडिया, प्रा. शंकर आठरे आणि संगीता झिंझुरके यांची उपस्थिती लाभणार आहे.
दरम्यान, या पुरस्काराची घोषणा होताच अमरावतीसह विविध सामाजिक, साहित्यिक व सांस्कृतिक क्षेत्रातून देवीलाल रौराळे यांच्यावर अभिनंदनाचा वर्षाव होत आहे.