मुंबई | प्रतिनिधी
‘सैराट’ चित्रपटातून ‘सल्या’ ही भूमिका साकारून घराघरात पोहोचलेला अभिनेता अरबाज शेख सध्या वैयक्तिक कारणामुळे चर्चेत आहे. त्याच्या वडिलांना ब्रेन हॅमरेज झाल्यानंतर उपचारासाठी मोठा खर्च होत असल्याची माहिती देणारा त्याचा भावनिक व्हिडिओ सोशल मीडियावर मोठ्या प्रमाणात व्हायरल झाला होता. या प्रकरणाची दखल घेत राज्य सरकारकडून मदतीचा हात पुढे करण्यात आला आहे.
राज्याचे उद्योगमंत्री उदय सामंत यांनी अरबाज शेखच्या वडिलांच्या उपचारासाठी 1 लाख रुपयांची आर्थिक मदत जाहीर केली असून त्याचा धनादेशही अरबाजकडे सुपूर्द करण्यात आला आहे. या मदतीमुळे उपचाराचा आर्थिक भार काही प्रमाणात हलका होणार आहे.
यापूर्वी उपमुख्यमंत्री एकनाथ शिंदे यांनीही या प्रकरणाची गंभीर दखल घेत शिवसेना वैद्यकीय मदत कक्षाचे प्रमुख मंगेश चिवटे यांना तातडीने सोलापूरला जाऊन कुटुंबाची भेट घेण्याच्या सूचना दिल्या होत्या. त्यानंतर सोलापूरमधील वळसंगकर हॉस्पिटलने उपचाराची जबाबदारी स्वीकारत आवश्यक वैद्यकीय मदत देण्याचा निर्णय घेतला.
दरम्यान, अरबाज शेखने सुरुवातीला एका खासगी रुग्णालयावर त्यांच्या मेडिकलमधूनच औषधे खरेदी करण्याची सक्ती केल्याचा आरोप केला होता. या तक्रारीची अन्न व औषध प्रशासनाने चौकशी केली. तपासात काही गंभीर त्रुटी आढळल्याने संबंधित मेडिकलची औषध विक्री तात्पुरती बंद करण्याचे आदेश देण्यात आले.
सरकारकडून मिळालेल्या मदतीमुळे आणि वैद्यकीय उपचारासाठी मिळालेल्या सहकार्यामुळे अरबाज शेखच्या कुटुंबाला मोठा दिलासा मिळाला आहे. या संवेदनशील निर्णयाचे सोशल मीडियावरही अनेकांकडून स्वागत होत आहे.
आधी आई गमावली, आता वडिलांचेही निधन; ‘तारक मेहता’च्या बाघावर दुःखाचा डोंगर कोसळला
