नवी दिल्ली : बॉलिवूडमधील प्रसिद्ध विनोदी अभिनेता राजपाल यादव याला चेक बाऊन्स प्रकरणात दिल्ली उच्च न्यायालयाने मोठा धक्का दिला आहे. न्यायालयाने कनिष्ठ न्यायालयाचा निर्णय कायम ठेवत राजपाल यादवला 3 महिन्यांच्या तुरुंगवासाची शिक्षा सुनावली आहे. तसेच तक्रारदार कंपनीची थकबाकी परत करण्याचे आदेशही दिले आहेत.
या प्रकरणात राजपाल यादवची पत्नी राधा यादव यांचाही सहआरोपी म्हणून समावेश आहे. न्यायालयाने त्यांनाही संबंधित रक्कम परत करण्याचे निर्देश दिले आहेत.
हे प्रकरण 2010 सालातील आहे. राजपाल यादवने आपल्या ‘अता, पता, लापता’ या चित्रपटाच्या निर्मितीसाठी ‘मुरली प्रोजेक्ट्स प्रायव्हेट लिमिटेड’ या कंपनीकडून सुमारे 5 कोटी रुपयांचे कर्ज घेतले होते. मात्र चित्रपट बॉक्स ऑफिसवर अपयशी ठरल्याने आर्थिक अडचणी निर्माण झाल्या आणि कर्जाची परतफेड होऊ शकली नाही.
तक्रारदार कंपनीच्या म्हणण्यानुसार, राजपाल यादवने कर्ज फेडण्यासाठी कंपनीला 7 धनादेश दिले होते. मात्र हे सर्व चेक बाऊन्स झाल्याने त्याच्याविरोधात न्यायालयीन कारवाई सुरू झाली.
दरम्यान, सुनावणीदरम्यान राजपाल यादवने अनेकदा पैसे परत करण्याचे आश्वासन दिले होते. मात्र ते पूर्ण न झाल्याने न्यायालयाने अखेर शिक्षा कायम ठेवली.
या निर्णयानंतर राजपाल यादवचे जुने वक्तव्य पुन्हा सोशल मीडियावर चर्चेत आले आहे. त्याने एका सुनावणीदरम्यान “5 वेळा तुरुंगात जाईन, पण एक पैसाही देणार नाही” असे कथितपणे म्हटल्याची चर्चा पुन्हा रंगली आहे.
न्यायालयाच्या या निर्णयामुळे हे प्रकरण पुन्हा एकदा चर्चेचा विषय बनले असून सोशल मीडियावरही विविध प्रतिक्रिया उमटत आहेत.
