मुंबई | प्रतिनिधी
मुंबई-अहमदाबाद राष्ट्रीय महामार्गावरील मीरा रोड येथे पहाटेच्या सुमारास एक भीषण हिट अँड रनची घटना घडली. ठाकूर मॉलजवळ भरधाव अज्ञात वाहनाने दुचाकीला जोरदार धडक दिल्याने 35 वर्षीय तरुणाचा जागीच मृत्यू झाला. धक्कादायक बाब म्हणजे, अपघातानंतर चालकाने वाहन न थांबवता तरुणाला काही अंतरापर्यंत फरफटत नेले आणि घटनास्थळावरून फरार झाला.
मृत तरुणाचे नाव जाकीर मोहम्मद शेख (वय 35) असे असून, ते पहाटे दुचाकीवरून जात असताना मागून आलेल्या भरधाव वाहनाने त्यांना जोरदार धडक दिली. धडक इतकी भीषण होती की त्यांच्या शरीराचे काही भाग रस्त्यावर विखुरले गेले.
घटनेची माहिती मिळताच काशिमीरा पोलिसांनी घटनास्थळी धाव घेतली. मृतदेह ताब्यात घेऊन शवविच्छेदनासाठी रुग्णालयात पाठवण्यात आला आहे.
या प्रकरणात पोलिसांसमोर मोठे आव्हान उभे राहिले आहे. ज्या ठिकाणी अपघात झाला त्या परिसरात सीसीटीव्ही कॅमेरे नसल्याने आरोपी वाहनाचा शोध घेणे कठीण झाले आहे. पोलिसांनी अज्ञात वाहनचालकाविरुद्ध गुन्हा दाखल केला असून, महामार्गावरील टोल नाक्यांवरील सीसीटीव्ही फुटेजच्या आधारे आरोपीचा शोध सुरू आहे.
दरम्यान, या घटनेमुळे मीरा रोड परिसरात हळहळ व्यक्त होत असून, राष्ट्रीय महामार्गांवरील सुरक्षेचा प्रश्न पुन्हा एकदा ऐरणीवर आला आहे.
