गौरव प्रकाशन अमरावती | प्रतिनिधी
पावसाळ्यात चिखलदऱ्याच्या निसर्गसौंदर्याचा आनंद घेण्यासाठी जाणाऱ्या पर्यटकांसाठी राज्य परिवहन महामंडळाने मोठी सुविधा उपलब्ध करून दिली आहे. आता दर रविवारी अमरावती ते चिखलदरा ‘दर्शन’ विशेष एसटी बस सेवा सुरू करण्यात आली आहे. या सेवेमुळे पर्यटकांना आरामदायी, सुरक्षित आणि आनंददायी प्रवासाचा अनुभव मिळणार आहे.
महामंडळाने या सेवेसाठी आधुनिक बीएस प्रकारातील नवीन ‘लालपरी’ बस उपलब्ध करून दिली आहे. बसची आकर्षक सजावट करण्यात येणार असून प्रवाशांच्या मनोरंजनासाठी साऊंड सिस्टीमची सुविधाही असणार आहे. तसेच प्रवाशांच्या सुरक्षिततेला प्राधान्य देत या बसवर विशेषतः निर्व्यसनी चालक आणि वाहक नियुक्त करण्यात आले आहेत.
ही विशेष बस सकाळी ८ वाजता अमरावतीहून धामणगाव मार्गे चिखलदऱ्याकडे रवाना होईल. चिखलदऱ्यात पोहोचल्यानंतर पर्यटकांना गार्डन पॉइंट, देवी पॉइंट, किल्ला पॉइंट, लेक पॉइंट, पंचबोल पॉइंट आणि भीमकुंड पॉइंट यांसारख्या प्रमुख पर्यटनस्थळांना भेट देता येणार आहे. परतीचा प्रवास सायंकाळी ५ वाजता चिखलदऱ्यावरून सुरू होईल.
चिखलदरा का आहे खास?
विदर्भातील एकमेव थंड हवेचे ठिकाण म्हणून ओळखले जाणारे चिखलदरा समुद्रसपाटीपासून सुमारे १,११८ मीटर उंचीवर वसलेले आहे. हिरवीगार जंगले, धुक्याने भरलेल्या दऱ्या, सुंदर धबधबे आणि वन्यजीव यामुळे हे ठिकाण पर्यटकांचे आवडते ठरते.
महाभारतातील कथेनुसार, भीमाने कीचकाचा वध करून त्याला दरीत फेकल्यामुळे या परिसराला सुरुवातीला ‘किचकदरा’ असे नाव पडले. पुढे त्याचाच अपभ्रंश होऊन ‘चिखलदरा’ हे नाव रूढ झाले.
पाहण्यासारखी ठिकाणे
चिखलदऱ्याजवळील भीमकुंड, गाविलगड किल्ला, हरिकेन पॉइंट आणि महाराष्ट्रातील एकमेव कॉफीचे मळे पर्यटकांसाठी विशेष आकर्षण आहेत. पावसाळ्यात येथील निसर्ग अधिकच खुलून दिसत असल्याने दरवर्षी हजारो पर्यटक येथे भेट देतात.
महामंडळाने पर्यटकांना या विशेष बस सेवेचा लाभ घेण्याचे आवाहन केले असून, अधिक माहिती व आरक्षणासाठी संबंधित एसटी आगाराशी संपर्क साधण्यास सांगितले आहे.
