कोल्हापूर | प्रतिनिधी
कोल्हापूर जिल्ह्यातील पेठवडगाव येथे भरदिवसा घडलेल्या एका धक्कादायक घटनेने संपूर्ण परिसर हादरला आहे. चारित्र्याच्या संशयातून पतीने पत्नीवर कोयत्याने सपासप वार करून तिची निर्घृण हत्या केल्याची घटना एसटी स्टँड परिसरात घडली. या हल्ल्यानंतर आरोपी घटनास्थळावरून फरार झाला असून पोलीस त्याचा शोध घेत आहेत.
मृत महिलेचे नाव अमृता दीपक कांबळे (वय 30) असे असून, आरोपी दीपक लाडू कांबळे (वय 35, रा. सावर्डे) असल्याची माहिती पोलिसांनी दिली आहे.
प्राथमिक माहितीनुसार, दोघांनी आठ वर्षांपूर्वी प्रेमविवाह केला होता. त्यांना दोन मुली असून काही दिवसांपासून कौटुंबिक वाद सुरू होता. अमृता कांबळे या एका वकिलाला भेटण्यासाठी पेठवडगाव एसटी स्टँडच्या मागील कॉम्प्लेक्समध्ये आल्या असताना आरोपी तेथे पोहोचला.
दोघांमध्ये वाद झाल्यानंतर आरोपीने सोबत आणलेल्या कोयत्याने अमृता यांच्यावर वार केले. गंभीर जखमी झालेल्या अमृता यांचा घटनास्थळीच मृत्यू झाला.
हल्ला थांबवण्यासाठी काही नागरिकांनी प्रयत्न केला. मात्र, “ही माझी पत्नी आहे, मध्ये पडू नका,” असे म्हणत आरोपीने नागरिकांनाही धक्काबुक्की केली आणि घटनास्थळावरून पळ काढला.
घटनेची माहिती मिळताच वडगाव पोलीस घटनास्थळी दाखल झाले. पंचनामा करून तपास सुरू करण्यात आला असून आरोपीचा शोध सुरू आहे. प्राथमिक तपासात चारित्र्याच्या संशयातून हा खून झाल्याची शक्यता पोलिसांनी व्यक्त केली आहे. तपास पूर्ण झाल्यानंतरच नेमके कारण स्पष्ट होणार आहे.
