मुंबई | प्रतिनिधी
भारतीय रेल्वेच्या 1AC डब्यात हनिमून रूमसारखी सजावट करण्यात आल्याचा व्हिडिओ सोशल मीडियावर मोठ्या प्रमाणात व्हायरल झाला आहे. हा व्हिडिओ समोर आल्यानंतर रेल्वे प्रशासनाने तातडीने कारवाई करत संबंधित तिकीट तपासनीस (टीटीई) यांना निलंबित केले आहे. या घटनेमुळे रेल्वेच्या सुरक्षाव्यवस्थेवरही प्रश्नचिन्ह उपस्थित झाले आहे.
मिळालेल्या माहितीनुसार, 6 जुलै 2026 रोजी धावणाऱ्या 11002 नंदीग्राम एक्सप्रेसच्या 1AC कोचमध्ये प्रवास करणाऱ्या एका जोडप्याने आपला प्रवास खास बनवण्यासाठी संपूर्ण केबिनची फुलांनी आणि सजावटीच्या साहित्याने हनिमून रूमप्रमाणे सजावट करून घेतली होती.
ही सजावट करण्यासाठी संबंधित प्रवाशांनी ऑनलाइन एका खासगी डेकोरेशन सेवा पुरवणाऱ्याशी संपर्क साधला. संबंधित डेकोरेटरला रेल्वेच्या डब्यात प्रवेश देण्यात आला आणि त्याने केबिन सजवली. याच घटनेचा व्हिडिओ सोशल मीडियावर व्हायरल झाल्यानंतर रेल्वे प्रशासनाने गंभीर दखल घेतली.
रेल्वेच्या प्राथमिक चौकशीत परवानगीशिवाय बाहेरील व्यक्तीला रेल्वेच्या डब्यात प्रवेश दिल्याचे समोर आले. याला सुरक्षा नियमांचे उल्लंघन मानत संबंधित टीटीईला तात्काळ निलंबित करण्यात आले असून विभागीय चौकशीचे आदेश देण्यात आले आहेत.
प्रवाशांना सजावट करता येते का?
रेल्वेच्या माहितीनुसार, एखाद्या प्रवाशाने संपूर्ण केबिन आरक्षित केली असल्यास तो आपल्या पसंतीनुसार सजावट करू शकतो. मात्र, त्यासाठी बाहेरील व्यक्तीला रेल्वे प्रशासनाच्या परवानगीशिवाय डब्यात प्रवेश देणे नियमबाह्य आहे. याच कारणामुळे या प्रकरणात कारवाई करण्यात आली आहे.
रेल्वे प्रशासनाने स्पष्ट केले की, सुरक्षा नियमांचे उल्लंघन कोणत्याही परिस्थितीत सहन केले जाणार नाही आणि अशा घटनांवर कठोर कारवाई सुरू राहील.
