नाशिक | प्रतिनिधी
नाशिक जिल्ह्यातील बागलाण तालुक्यातील आखतवाडे येथे घडलेल्या एका धक्कादायक घटनेने संपूर्ण जिल्ह्यात खळबळ उडाली आहे. रविवारी रात्री चिकनचे जेवण केल्यानंतर आणि त्यानंतर दही खाल्ल्यानंतर एका वृद्ध दाम्पत्याची प्रकृती अचानक बिघडली. उपचारादरम्यान द्वारकाबाई ह्याळीज यांचा मृत्यू झाला असून शांताराम ह्याळीज यांच्यावर मालेगाव येथील खासगी रुग्णालयाच्या अतिदक्षता विभागात उपचार सुरू आहेत. त्यांची प्रकृती चिंताजनक असल्याची माहिती डॉक्टरांनी दिली आहे.
नेमकं काय घडलं?
मिळालेल्या माहितीनुसार, रविवारी रात्री ह्याळीज कुटुंबाने चिकनचे जेवण केले. त्यानंतर दही खाल्ल्यानंतर काही वेळातच वृद्ध दाम्पत्याला अस्वस्थ वाटू लागले. प्रकृती झपाट्याने खालावल्यानंतर त्यांना तातडीने रुग्णालयात दाखल करण्यात आले. उपचार सुरू असतानाच द्वारकाबाई ह्याळीज यांचा मृत्यू झाला. तर शांताराम ह्याळीज यांच्यावर अजूनही अतिदक्षता विभागात उपचार सुरू आहेत.
मुलगा मात्र पूर्णपणे सुरक्षित
या घटनेतील आणखी एक गूढ बाब म्हणजे कुटुंबातील मुलगा मात्र पूर्णपणे फिट अँड फाईन असल्याचे समोर आले आहे. त्यामुळे नेमकी विषबाधा कशामुळे झाली, हा प्रश्न अधिकच गंभीर बनला आहे.
विषबाधेचा प्राथमिक अंदाज, पण अधिकृत पुष्टी नाही
प्राथमिक माहितीनुसार, अन्नातून विषबाधा झाल्याची शक्यता व्यक्त केली जात आहे. मात्र चिकन आणि दही एकत्र खाल्ल्यामुळेच विषबाधा झाली, असा कोणताही अधिकृत निष्कर्ष अद्याप समोर आलेला नाही. डॉक्टरांनी स्पष्ट केले आहे की, प्रयोगशाळेतील तपासणी अहवाल आणि अन्न नमुन्यांच्या चाचणीनंतरच मृत्यूचे नेमके कारण स्पष्ट होईल.
डॉक्टरांनी काय सांगितले?
वैद्यकीय तज्ज्ञांच्या मते, कोणत्याही अन्नपदार्थामुळे विषबाधा झाली आहे का, हे प्रयोगशाळेतील तपासणीनंतरच निश्चित करता येते. त्यामुळे नागरिकांनी सोशल मीडियावरील अपूर्ण किंवा अप्रमाणित माहितींवर विश्वास ठेवू नये, असे आवाहन करण्यात आले आहे.
तपास सुरू
या घटनेनंतर संबंधित यंत्रणांकडून तपास सुरू करण्यात आला आहे. वैद्यकीय अहवाल आणि तपासाचा अंतिम निष्कर्ष समोर आल्यानंतरच या दुर्दैवी घटनेमागील खरे कारण स्पष्ट होणार आहे.
