सोशल मीडियावर सध्या एक व्हिडिओ मोठ्या प्रमाणात व्हायरल होत आहे. या व्हिडिओमध्ये एक लोको पायलट ट्रेनमधून खाली उतरून समोसे खरेदी करताना दिसत आहे. यानंतर अनेकांनी दावा केला की, समोसे खरेदी करण्यासाठीच रेल्वेगाडी थांबवण्यात आली होती. हा प्रकार मध्य प्रदेशातील इंदौर-महू रेल्वे मार्गावरील असल्याचेही सांगण्यात आले.
मात्र, या व्हायरल दाव्यावर आता पश्चिम रेल्वेने अधिकृत स्पष्टीकरण दिले असून सोशल मीडियावर पसरवला जाणारा दावा पूर्णपणे चुकीचा आणि दिशाभूल करणारा असल्याचे स्पष्ट केले आहे.
नेमकं काय आहे प्रकरण?
व्हायरल व्हिडिओमध्ये एक लोको पायलट पुलाजवळ थांबलेल्या ट्रेनमधून उतरतो, जवळच्या दुकानातून समोसे घेतो आणि पुन्हा ट्रेनमध्ये चढतो. यानंतर सोशल मीडियावर अशी चर्चा सुरू झाली की, चालक समोसे खाण्यासाठी मुद्दाम ट्रेन थांबवत होता.
काही पोस्टमध्ये तर हा प्रकार वारंवार घडत असल्याचा आरोपही करण्यात आला. त्यामुळे रेल्वे प्रशासनावर आणि संबंधित कर्मचाऱ्यावर टीकेची झोड उठली.
पश्चिम रेल्वेने सांगितले वास्तव
पश्चिम रेल्वेने दिलेल्या माहितीनुसार, व्हिडिओमध्ये दिसणारी गाडी ही प्रवासी डेमू ट्रेन नसून मालगाडी होती.
ही मालगाडी राऊ यार्ड परिसरात सुरू असलेल्या तांत्रिक आणि अभियांत्रिकी कामांमुळे होम सिग्नलवर अधिकृतपणे थांबवण्यात आली होती. त्यामुळे ट्रेन समोसे घेण्यासाठी थांबवण्यात आली होती, हा दावा पूर्णपणे चुकीचा आहे.
सिग्नलमुळे थांबलेल्या वेळेचा केला वापर
रेल्वे प्रशासनाने स्पष्ट केले की, मालगाडी सिग्नलमुळे आधीपासूनच थांबलेली होती. त्या दरम्यान सहाय्यक लोको पायलट खाली उतरला आणि स्वतःसाठी समोसे खरेदी करून पुन्हा ट्रेनमध्ये परतला.
म्हणजेच, ट्रेन थांबवण्यामागे समोसे खरेदी करण्याचा कोणताही संबंध नव्हता.
अफवांपासून सावध राहण्याचे आवाहन
पश्चिम रेल्वेने नागरिकांना सोशल मीडियावरील अपूर्ण किंवा चुकीच्या माहितीवर विश्वास ठेवू नये, असे आवाहन केले आहे. व्हिडिओ चुकीच्या संदर्भात व्हायरल करून रेल्वेची आणि कर्मचाऱ्यांची प्रतिमा खराब करण्याचा प्रयत्न झाल्याचेही प्रशासनाने म्हटले आहे.
तथ्य पडताळूनच कोणतीही माहिती शेअर करावी, असे रेल्वेने नागरिकांना आवाहन केले आहे.
