मुंबई : ‘तारक मेहता का उल्टा चष्मा’ या लोकप्रिय मालिकेत ‘तारक मेहता’ ही भूमिका साकारून घराघरात पोहोचलेले अभिनेते, कवी आणि लेखक शैलेश लोढा सध्या एका खास कारणामुळे चर्चेत आहेत. त्यांच्या मुलगी स्वरा लोढा हिचा नुकताच थाटामाटात विवाह पार पडला असून या लग्नसोहळ्याचे अनेक फोटो आणि व्हिडीओ सोशल मीडियावर मोठ्या प्रमाणात व्हायरल होत आहेत.
लेकीच्या लग्नाचा आनंद शैलेश लोढा यांनी मनापासून साजरा केला. एका व्हायरल व्हिडीओमध्ये ते लोकप्रिय गायक कैफ साबरी यांच्यासोबत “तेरे जैसा यार कहाँ” हे गाणं गाताना दिसत आहेत. याशिवाय त्यांनी बॉलिवूड गाण्यांवर उत्साहात डान्सही केला. त्यांच्या या खास क्षणांना चाहत्यांकडून मोठी पसंती मिळत आहे.
निळ्या रंगाचा कुर्ता आणि पांढरा पायजमा असा साधा पण आकर्षक पेहराव केलेल्या शैलेश लोढा यांचा आनंद प्रत्येक व्हिडीओमध्ये स्पष्टपणे दिसून येतो. मुलगी स्वरा मात्र नेहमीच प्रकाशझोतातून दूर राहिली आहे. ती एक लेखिका असून तिने तिची आई डॉ. स्वाती लोढा यांच्यासोबत ’54 Reasons Why Parents Suck’ या पुस्तकाचे सहलेखन केले आहे.
दरम्यान, स्वराच्या पतीबाबत अद्याप कोणतीही अधिकृत माहिती समोर आलेली नाही. मात्र लग्नातील आनंदी वातावरण, कुटुंबातील भावनिक क्षण आणि शैलेश लोढा यांचा उत्साही डान्स यामुळे हे व्हिडीओ सोशल मीडियावर वेगाने व्हायरल होत आहेत.
विशेष म्हणजे, 2022 मध्ये निर्मात्यांसोबत झालेल्या मतभेदांनंतर शैलेश लोढा यांनी ‘तारक मेहता का उल्टा चष्मा’ या मालिकेला रामराम ठोकला होता. त्यानंतरही त्यांची लोकप्रियता कायम असून चाहत्यांकडून त्यांना आजही भरभरून प्रेम मिळत आहे.
