‘झुंड’नं दिलं नाव, पण आयुष्याने मारली ‘फाऊल’; बाबू छत्रीच्या हत्येनं हादरलं नागपूर!
नागपूर : सिनेमात ‘झुंड’चा खेळ खेळणारा अभिनेता, पण वास्तवात मात्र आयुष्याच्या खेळात पराभूत झाला. ‘झुंड’ फेम प्रियांशू क्षत्रिय उर्फ बाबू छत्रीचा निर्घृण खून करण्यात आल्याने नागपूर हादरलं आहे. ७ ऑक्टोबरच्या रात्री जरीपटका परिसरात ही थरारक घटना घडली.
पोलिसांना प्रियांशू अर्धनग्न अवस्थेत तारेनं बांधलेला आणि गंभीर जखमी अवस्थेत सापडला. त्याच्या शरीरावर चाकूचे अनेक वार होते. तातडीने रुग्णालयात दाखल करण्यात आलं, पण डॉक्टरांनी त्याला मृत घोषित केलं.
या घटनेनंतर परिसरात खळबळ उडाली असून पोलिसांनी संशयित लालबहादुर साहू याला अटक केली आहे. तपास सुरू आहे. प्रियांशू क्षत्रिय हा नागराज मंजुळेंच्या ‘झुंड’ चित्रपटात छोट्या पण ठसठशीत भूमिकेत झळकला होता. ‘बाबू छत्री’ या नावाने तो चर्चेत आला. पण प्रसिद्धीच्या प्रकाशात आलेला हा चेहरा नंतर गुन्ह्यांच्या सावलीत गेला.
सोन्याच्या दागिन्यांच्या चोरीसह अनेक गुन्ह्यांमध्ये त्याचं नाव आलं होतं. लोक म्हणतात, “झुंड” मध्ये फुटबॉल खेळणारा बाबू छत्री आयुष्याच्या मैदानावर ‘रेड कार्ड’ घेऊन बाहेर गेला!
