पंढरी
आलो पंढरीसी।विठूच्या गावाशी।
चंद्रभागेपाशी।स्थिरावलो।।
पुंडरिका भेटी।परब्रह्म आले।
अठ्ठावीस झाले।युगे धरा।।
वाळवंटी दिसे।वैष्णवांची दाटी।
एकमेका भेटी।प्रेमभावे।।
तीर्थांचे माहेर।विठूची पंढरी।
आमुची वैखरी।विठू नामें।।
सर्व भक्तांसाठी।सम आचरण।
समदृष्टी जाण। विठोबाची।।
भाव जैसा जैसा।तैसा पावे हरि।
कृपा सर्वावरी।करीतसे।।
-आबासाहेब कडू
कार्तिक एकादशी
(२-११-२०२५)
सर्वांना कार्तिक एकादशीच्या हार्दिक शुभेच्छा