पुणे | प्रतिनिधी
पुण्यातील चर्चित केतन अग्रवाल हत्या प्रकरणात तपास जसजसा पुढे सरकत आहे, तसतसे एकापाठोपाठ एक धक्कादायक खुलासे समोर येत आहेत. पोलिस तपासात मिळालेल्या माहितीनुसार, केतनचा मृत्यू घडवून आणण्यापूर्वी त्याला ‘स्लो पॉयझन’ देण्याचा आणि कायमचे अपंग करण्याचा कट रचण्यात आल्याचा दावा समोर आला आहे.
तपास यंत्रणांच्या माहितीनुसार, केतनचे लग्न ठरल्यानंतरच आरोपींनी त्याच्या हत्येचा कट आखण्यास सुरुवात केली होती. सुरुवातीला विष देऊन किंवा गंभीर इजा करून त्याला संपवण्याचा प्रयत्न करण्याची योजना होती. मात्र आवश्यक विषारी पदार्थ मिळू न शकल्याने हा डाव यशस्वी झाला नसल्याचे तपासातून समोर आले आहे.
पोलिस चौकशीसाठी घेतली विशेष तयारी
या प्रकरणातील आणखी एक धक्कादायक बाब म्हणजे, अटक झाल्यास पोलिस चौकशीला कसे सामोरे जायचे यासाठी आरोपींनी इंटरनेटवरील सुमारे दोन तासांचा जपानी व्हिडिओ पाहिल्याचा दावा तपासात करण्यात आला आहे.
या व्हिडिओमध्ये चौकशीदरम्यान शांत राहणे, प्रश्नांना कशा प्रकारे उत्तर द्यावे आणि स्वतःवर संशय येऊ न देण्याबाबत मार्गदर्शन असल्याचे सांगितले जात आहे. पोलिसांनी संबंधित व्हिडिओंच्या लिंक आरोपींच्या वेब हिस्ट्रीमधून मिळाल्याचा दावा केला आहे.
तपासाला मिळाला नवा धागा
या नव्या माहितीमुळे तपास अधिक वेगाने पुढे जाण्याची शक्यता व्यक्त केली जात आहे. पोलिस विविध डिजिटल पुरावे, मोबाईल डेटा आणि इतर तांत्रिक माहितीची पडताळणी करत असून संपूर्ण कटाचा उलगडा करण्याचा प्रयत्न सुरू आहे.
सध्या या प्रकरणातील दोन्ही आरोपी न्यायालयीन कोठडीत असून पुढील तपास सुरू आहे. तपास पूर्ण होईपर्यंत सर्व दावे हे पोलिस तपासातील माहितीवर आधारित असून न्यायालयीन निर्णय येणे बाकी आहे.
