कोलकाता : प्रसिद्ध गायक Arijit Singh यांनी पुन्हा एकदा आपल्या साधेपणाने आणि माणुसकीने लाखो चाहत्यांची मनं जिंकली आहेत. जीवन-मरणाच्या संघर्षात असलेल्या अवघ्या आठ वर्षांच्या एका चिमुकल्याची एकच इच्छा होती—”मला अरिजित दादांना एकदा भेटायचं आहे.”
गंभीर आजारामुळे रुग्णालयात उपचार घेत असलेल्या या मुलाला अरिजित सिंग यांच्या गाण्यांमधून मानसिक आधार मिळत होता. वेदनांशी झुंज देताना तो सतत त्यांच्या गाण्यांमध्ये रमायचा आणि त्यांना भेटण्याची इच्छा व्यक्त करायचा.
ही इच्छा अरिजित सिंग यांच्यापर्यंत पोहोचताच त्यांनी कोणताही गाजावाजा किंवा प्रसिद्धीचा हव्यास न ठेवता थेट कोलकात्यातील रुग्णालय गाठले. ते शांतपणे त्या चिमुकल्याच्या बेडजवळ पोहोचले, त्याच्याशी प्रेमाने संवाद साधला आणि त्याला धीर दिला.
अरिजित सिंग यांना प्रत्यक्ष पाहताच चिमुकल्याच्या चेहऱ्यावर आनंद खुलला. काही क्षणांसाठी का होईना, पण त्याच्या वेदना जणू विसरल्या गेल्या. या भेटीमुळे उपस्थित डॉक्टर, परिचारिका आणि कुटुंबीयही भावूक झाले.
या घटनेची माहिती सोशल मीडियावर समोर आल्यानंतर अरिजित सिंग यांच्या साधेपणाचे आणि माणुसकीचे सर्वत्र कौतुक होत आहे. प्रसिद्धीपेक्षा माणुसकीला अधिक महत्त्व देणारा कलाकार म्हणून त्यांची प्रतिमा पुन्हा एकदा अधोरेखित झाली आहे.
