सातारा :
सातारा जिल्ह्यातील ठोसेघर येथे अत्यंत हृदयद्रावक घटना घडली आहे. शाळा आणि क्लाससाठी तयारी करत असताना नववीत शिकणाऱ्या 14 वर्षीय विद्यार्थ्याचा हृदयविकाराच्या तीव्र झटक्याने मृत्यू झाला. या घटनेमुळे संपूर्ण गावासह शाळेवर शोककळा पसरली आहे.
मिळालेल्या माहितीनुसार, स्वप्निल नामदेव आवकीरकर (वय 14) हा ठोसेघर येथील आदर्श माध्यमिक विद्यालयात इयत्ता नववीत शिक्षण घेत होता. शनिवारी सकाळी सुमारे 6 वाजण्याच्या सुमारास तो क्लासला जाण्यापूर्वी आंघोळीसाठी बाथरूममध्ये गेला. त्याचवेळी त्याला अचानक हृदयविकाराचा तीव्र झटका आला.
कुटुंबीयांनी तातडीने त्याला जिल्हा शासकीय रुग्णालयात दाखल केले. मात्र डॉक्टरांनी उपचाराचे सर्व प्रयत्न करूनही त्याचा जीव वाचवता आला नाही. डॉक्टरांनी त्याला मृत घोषित केल्यानंतर कुटुंबीयांवर दुःखाचा डोंगर कोसळला.
स्वप्निल हा अभ्यासू, शांत आणि नम्र स्वभावाचा विद्यार्थी म्हणून ओळखला जात होता. तो दररोज आपल्या मोठ्या भावासोबत साताऱ्यात क्लासला जात असे. क्लास पूर्ण झाल्यानंतर तो गावात परत येऊन नियमित शाळेत उपस्थित राहत होता.
शनिवारीही तो नेहमीप्रमाणे क्लासला जाण्याची तयारी करत होता. मात्र नियतीने त्याच्यावर काळाचा घाला घातला. एवढ्या लहान वयात झालेल्या या दुर्दैवी घटनेमुळे ठोसेघर परिसरात हळहळ व्यक्त होत असून शाळेतील शिक्षक, मित्र आणि ग्रामस्थांनी स्वप्निलला भावपूर्ण श्रद्धांजली अर्पण केली आहे.
