नाचणारे हवे….

स्वतः माणसाला । माणूस मारतो ।

अधर्म करतो । दैत्यासम ।।

ईतर प्राण्यात । नाही अशी प्रथा ।

ऐकिवात कथा । आहे कुठे? ।।

नाचणारे हवे । नाही बोलणारे ।

व्यथा मांडणारे । दोषी झाले ।।

निर्लज्ज माणसे । आवडती फार ।

खऱ्यास नकार । मिळे सदा ।।

गरीबांची व्यथा । मांडणारे कमी ।

आहेच संयमी । किती इथे? ।।

सगळ्यांना प्रिय । धन जिवाहून ।

हत्यार म्हणून । त्यांच्या हाती ।।

पैशासाठी कोणी । गुलाम बनून ।

तळवे चाटून । राहतात ।।

माणुसकी कुठे । राहिली शिल्लक ।

माणूस मालक । माणसाचा ।।

कुठले संस्कार । कुठली पद्धत? ।

बाप होतो नत । मुलांपुढे ।।

अस्ताला चालली । माणुसकी आता ।

हरवला दाता । गरीबांचा ।।

अजुस वाटते । कठीण शोधणे ।

माणूस पाहणे । माणसात ।।

अजय रमेश चव्हाण,तरनोळी

ता.दारव्हा,जि.यवतमाळ

मो.८८०५८३६२०७

Post Views: 392

आमच्याविषयी