मुंबई | प्रतिनिधी
राजकीय वर्तुळात मोठी चर्चा रंगवणारी एक महत्त्वाची घडामोड समोर आली आहे. पक्षाच्या राष्ट्रीय अध्यक्षा सुनेत्रा पवार यांच्या अध्यक्षपदावर पुन्हा प्रश्नचिन्ह उपस्थित करण्यात आले आहे. पक्षाचे राष्ट्रीय सचिव सच्चिदानंद सिंह यांनी वकिलामार्फत नोटीस पाठवत राष्ट्रीय अध्यक्षपदाची निवडणूक पुन्हा घेण्याची मागणी केली आहे.
9 जुलै रोजी पाठवण्यात आलेल्या या नोटीसमध्ये 26 फेब्रुवारी 2026 रोजी झालेली राष्ट्रीय अध्यक्षपदाची निवडणूक नियमबाह्य आणि अवैध असल्याचा दावा करण्यात आला आहे. त्यामुळे ही निवडणूक रद्द करून स्वतंत्र आणि निष्पक्ष निवडणूक अधिकाऱ्याच्या देखरेखीखाली नव्याने निवडणूक घेण्यात यावी, अशी मागणी करण्यात आली आहे.
या नोटीसची प्रत राष्ट्रीय अध्यक्षा सुनेत्रा पवार, कार्यकारी अध्यक्ष प्रफुल्ल पटेल आणि पक्षाचे सचिव ब्रिजमोहन श्रीवास्तव यांनाही पाठवण्यात आली आहे. तसेच, नवीन निवडणूक होईपर्यंत विद्यमान राष्ट्रीय अध्यक्ष आणि पदाधिकाऱ्यांची यादी अमान्य मानावी, असेही नोटीसमध्ये नमूद करण्यात आले आहे.
यापूर्वी पक्षाचे प्रमुख अजित पवार यांच्या निधनानंतर सुनेत्रा पवार यांनी पक्षाची धुरा स्वीकारली होती. त्यानंतर त्यांची राष्ट्रीय अध्यक्षपदी एकमताने निवड झाली होती. तसेच त्यांनी उपमुख्यमंत्रिपदाचीही शपथ घेतली होती.
मात्र, आता पक्षातीलच वरिष्ठ नेत्याने निवडणूक प्रक्रियेवर आक्षेप घेतल्याने या प्रकरणाने नवे राजकीय वळण घेतले आहे. या नोटीसला सुनेत्रा पवार किंवा पक्षाकडून काय उत्तर दिले जाते, याकडे आता सर्वांचे लक्ष लागले आहे.
टीप : या वृत्तातील माहिती संबंधित नोटीस आणि समोर आलेल्या दाव्यांवर आधारित आहे. संबंधित पक्षाची अधिकृत भूमिका समोर आल्यानंतर वृत्त अद्ययावत केले जाईल.
