नाशिक : नाशिक जिल्ह्यातील कळवण तालुक्यातील मोहनदरी येथील शासकीय आदिवासी निवासी आश्रमशाळेत शिकणाऱ्या एका अल्पवयीन विद्यार्थिनीने बाळाला जन्म दिल्याची धक्कादायक घटना समोर आली आहे. या घटनेमुळे संपूर्ण परिसरात खळबळ उडाली असून, पोलिसांनी तत्काळ कारवाई सुरू केली आहे.
प्राथमिक चौकशीत संबंधित विद्यार्थिनीवर तिच्याच नात्यातील एका अल्पवयीन मुलाने लैंगिक अत्याचार केल्याचे उघड झाले आहे. या प्रकरणी कळवण पोलीस ठाण्यात पोक्सो (POCSO) कायद्यांतर्गत गुन्हा दाखल करण्यात आला आहे. आरोपी अल्पवयीन असल्याने त्याला ताब्यात घेऊन बालसुधारगृहात पाठविण्यात आले आहे.
प्रशासनाने दिलेल्या माहितीनुसार, ही घटना आश्रमशाळेच्या परिसरात घडलेली नसून विद्यार्थिनी सुट्टीसाठी गावी गेली असताना हा प्रकार घडला होता. त्यामुळे आश्रमशाळेच्या प्रशासनावर थेट जबाबदारी येत नसल्याचे स्पष्ट करण्यात आले आहे.
नाशिकचे आदिवासी विकास विभागाचे अप्पर आयुक्त दिनकर पावरा यांनी सांगितले की, या संपूर्ण प्रकरणाची सखोल चौकशी सुरू असून दोषींवर कायद्यानुसार कठोर कारवाई केली जाईल.
दरम्यान, या घटनेनंतर आश्रमशाळांमधील विद्यार्थिनींच्या सुरक्षिततेचा प्रश्न पुन्हा एकदा ऐरणीवर आला आहे. नियमित आरोग्य तपासणीदरम्यान ही बाब आधी का लक्षात आली नाही, असा सवालही उपस्थित केला जात आहे. या प्रकरणाची निष्पक्ष चौकशी करून जबाबदारांवर कठोर कारवाई करण्याची मागणी होत आहे.
