गौरव प्रकाशन अमरावती प्रतिनिधी :
अमरावती महानगरपालिकेत मोठा प्रशासकीय बदल झाला आहे. राज्य शासनाने जारी केलेल्या आदेशानुसार भारतीय प्रशासकीय सेवेतील ज्येष्ठ अधिकारी डॉ. मंगेश गोंदवले यांची अमरावती महानगरपालिकेच्या नव्या आयुक्तपदी नियुक्ती करण्यात आली आहे.
दरम्यान, विद्यमान आयुक्त वर्षा लड्डा यांची पुणे येथे महिला व बालविकास आयुक्त या महत्त्वाच्या पदावर बदली करण्यात आली आहे. विशेष म्हणजे, त्यांनी अवघ्या तीन महिन्यांपूर्वीच अमरावती महापालिकेचा कार्यभार स्वीकारला होता.
एप्रिल महिन्याच्या पहिल्या आठवड्यात पदभार घेतलेल्या वर्षा लड्डा यांची इतक्या कमी कालावधीत बदली झाल्याने शहरातील राजकीय आणि प्रशासकीय वर्तुळात चर्चांना उधाण आले आहे. या अचानक झालेल्या बदल्यामागे नेमकी कोणती कारणे आहेत, याबाबत विविध तर्क-वितर्क लावले जात आहेत.
आता नवे आयुक्त म्हणून डॉ. मंगेश गोंदवले अमरावती शहराच्या विकासकामांना कोणती गती देतात, याकडे सर्वांचे लक्ष लागले आहे.
