* वासनी मध्यम प्रकल्पाच्या ८२६ कोटींच्या खर्चास सुधारित मान्यता
- गौरव प्रकाशन वृत्त संकलन
अमरावती (प्रतिनिधी) : जिल्ह्यातील अचलपूर तालुक्यातील वासनी मध्यम प्रकल्पाच्या ८२६ कोटींच्या खर्चास सुधारित मान्यता देण्यात आली त्यामुळे ४ हजार ३१७ हेक्टर क्षेत्राला लाभ मिळणार आहे, असे माजी जलसंपदा राज्यमंत्री तथा आमदार बच्चूभाऊ कडू यांनी आज सांगितले.
अमरावती जिल्ह्यातील वासनी जलसंपदा प्रकल्पाला सुधारित मान्यता देऊन त्यांच्या कामांना वेग देण्याचा निर्णय आज झालेल्या मंत्रिमंडळ बैठकीत घेण्यात आला. बैठकीच्या अध्यक्षस्थानी मुख्यमंत्री एकनाथ शिंदे होते. वासनी मध्यम प्रकल्पाचे काम गतीने होण्यासाठी आवश्यक खर्चास मान्यता मिळण्याबाबत आमदार श्री. कडू यांच्याकडून मुख्यमंत्री एकनाथ शिंदे व उपमुख्यमंत्री देवेंद्र फडणवीस यांच्याकडे पाठपुरावा करण्यात आला. त्यानुसार मान्यता मिळाल्याने प्रकल्पाचे काम गती घेणार आहे.
आमदार श्री. कडू म्हणाले की, अचलपूर तालुक्यातील १६, दर्यापूर तालुक्यातील ४ व अंजनगांव तालुक्यातील ३ गावांना सिंचनाचा फायदा होणार आहे. या प्रकल्पास २००८-०९ मध्ये सुरुवात झाली. भूसंपादन, पुनवर्सन आदी बाबींचा खर्चामुळे प्रकल्प किमतीत वाढ झाली.वाढीव किमतीस मान्यता नसल्याने प्रकल्प २०१७ पासून बंद होता. शासनाने आता सुधारित खर्चास मान्यता दिल्याने प्रकल्पाचे काम वेग घेणार आहे.
प्रकल्पाचे भूसंपादन पूर्ण झाले आहे. धरण व सांडव्याचे काम ७० टक्के पूर्ण झाले आहे. पुनर्वसनाचे काम ८० टक्के पूर्ण झाले आहे. सिंचनासाठी बंदिस्त जलवाहिनीद्वारे सिंचन प्रस्तावित आहे. प्रकल्पावर आतापर्यंत ६०३ कोटी रु. खर्च झाला असून उर्वरित काम जून २०२४ पूर्वी पूर्ण करण्याचे नियोजन आहे.
प्रकल्पामुळे सिंचनाचे क्षेत्र वाढून कृषी उत्पादकतेत भर पडणार आहे, असा विश्वास श्री. कडू यांनी व्यक्त केला.त्याचप्रमाणे, सपन प्रकल्पाच्या ४९५.२९ कोटी खर्चास मान्यता मिळाल्याने ३४ गावांत लाभ होऊन ६ हजार ३८० हेक्टर सिंचन होणार आहे. राजुरा लघु प्रकल्पाच्या १९३.८१ कोटी खर्चास मान्यता मिळाल्याने एक हजार हेक्टर सिंचन होणार आहे. राजुरा, सपन, वासनी या तिन्ही प्रकल्पांचे काम मार्गी लागले असून एकूण १ हजार ५१६ कोटी सुधारित मान्यतेमुळे काम पूर्ण होऊन सिंचन क्षेत्रात ११ हजार ६९७ हेक्टरची वाढ होणार आहे.
- ————–
तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? आम्हास आपल्या परिसरातील बातम्या, लेख अवश्य पाठवा आणि प्रतिनिधी बना ! ताज्या बातम्यांसह अपडेट राहण्यासाठी लाइक करा Gaurav Prakashan फेसबुकपेज !
- ——————–
आम्ही तुमच्यासमोर बातम्या, कथा, कविता, वाचनीय लेख अश्या खूप साऱ्या लेखामार्फत भेटत असतो तुम्हाला काय अजून वाचायला आवडेल हे आम्हाला कमेंट मार्फत नक्की कळवा कारण तुमची एक कमेंट आमचे प्रोत्साहन वाढवत असते, तसेच आमचे फेसबुक पेज हि नक्की लाईक करा जेणेकरून तुम्हाला आमच्या सर्व अपडेट मिळतील आणि त्याचबरोबर आमचे फेसबुक पेज शेअर हि नक्की करा धन्यवाद…!
- -बंडूकुमार धवणे
- संपादक गौरव प्रकाशन
- ——————–
