फक्त ‘दलित’ असल्याने रूम नाकारली? अकोल्यात वंचित नेत्या डॉ. स्नेहल सोहनी यांचा गंभीर आरोप!
अकोला (प्रतिनिधी) : अकोल्यातून एक अत्यंत धक्कादायक आणि संतापजनक घटना समोर आली आहे. धम्मचक्र प्रवर्तन दिनानिमित्त आयोजित सभेसाठी आलेल्या वंचित बहुजन आघाडीच्या महिला प्रदेशाध्यक्षा डॉ. स्नेहल सोहनी यांना एका हॉटेलमध्ये ‘जात’ आणि ‘पक्षीय चिन्ह’ पाहून रूम देण्यास नकार देण्यात आल्याचा गंभीर आरोप करण्यात आला आहे. या प्रकरणी हॉटेलच्या मॅनेजरविरोधात अनुसूचित जाती-जमाती अत्याचार प्रतिबंधक कायद्यान्वये (ॲट्रॉसिटी) गुन्हा नोंदवण्यात आला आहे.
नेमके काय घडले?
वंचित बहुजन आघाडीचे नेते प्रकाश आंबेडकर यांच्या सभेसाठी डॉ. स्नेहल सोहनी या मुंबईतून अकोल्यात दाखल झाल्या होत्या. मुक्कामासाठी त्यांनी रायझिंगसन हॉटेलमध्ये जाण्याचे ठरवले. सुरुवातीला त्यांना हॉटेलमध्ये रूम दाखवण्यात आली. मात्र, त्यांचे सामान उघडल्यावर त्यात पंचशील ध्वज आणि निळा झेंडा (वंचित बहुजन आघाडीचे चिन्ह) दिसल्यानंतर हॉटेल मॅनेजरने अचानक रूम देण्यास नकार दिल्याचा आरोप डॉ. सोहनी यांनी केला आहे.
पोलिसांत तक्रार, गुन्हा दाखल
घटनेनंतर डॉ. सोहनी यांनी तात्काळ सिव्हिल लाईन पोलीस ठाण्यात धाव घेतली. त्यांच्या तक्रारीनुसार पोलिसांनी हॉटेल मॅनेजरविरोधात अनुसूचित जाती-जमाती अत्याचार प्रतिबंधक कायद्यान्वये (ॲट्रॉसिटी ॲक्ट) गुन्हा दाखल केला आहे. उपविभागीय पोलीस अधिकारी गजानन पडघन यांनी सांगितले, “फिर्यादीच्या तक्रारीच्या आधारे प्राथमिक गुन्हा नोंदवण्यात आला आहे. घटनेची सत्यता तपासण्यासाठी हॉटेलमधील CCTV फुटेजची तपासणी सुरू आहे. सर्व संबंधित व्यक्तींची चौकशी केली जाईल.”
सामाजिक वर्तुळात संताप
या घटनेनंतर सामाजिक वर्तुळात आणि आंबेडकरी चळवळीतील कार्यकर्त्यांमध्ये संतापाची लाट उसळली आहे. वंचित बहुजन आघाडीच्या कार्यकर्त्यांनी या घटनेचा निषेध करत हॉटेल मॅनेजरवर कठोर कारवाईची मागणी केली आहे.
वंचित बहुजन आघाडीचे नेते म्हणाले, “ही घटना केवळ एका महिलेशी झालेला अपमान नाही, तर संविधानाच्या मूल्यांवर घाला आहे. अकोल्यासारख्या शहरात अशी जातीय वागणूक देणं अत्यंत लज्जास्पद आहे.”
पुढील तपास सुरू
पोलिसांकडून सखोल चौकशी सुरू असून, दोषी आढळल्यास कठोर कारवाई होईल असे आश्वासन पोलिस प्रशासनाने दिले आहे. दरम्यान, या घटनेमुळे धम्मचक्र प्रवर्तन दिनाच्या पार्श्वभूमीवर अकोल्यात तापलेले वातावरण निर्माण झाले आहे.
हे वाचा – महात्मा फुले यांचे शैक्षणिक कार्य व ग्रंथसंपदा
फक्त ‘दलित’ असल्याने रूम नाकारली? अकोल्यात …
