पोषण आहार योजनेची भरीव अंमलबजावणी करा - खासदार नवनीत राणा

गौरव प्रकाशन वृत्त संकलन

अमरावती (प्रतिनिधी) : मेळघाटातील कुपोषण निर्मुलनासाठी शासकीय यंत्रणांव्दारे विविध उपाययोजना राबविल्या जातात. तथापि, कुपोषण निर्मुलनासाठी व्यापक दृष्टीतून नियोजन व अंमलबजावणी आवश्यक आहे. यासाठी मेळघाटात पोषण आहार योजनेची भरीव अंमलबजावणी करा, असे निर्देश खासदार नवनीत राणा यांनी आज येथे दिले.

जिल्ह्यात राबविण्यात येणाऱ्या केंद्र शासनाच्या योजनेसंदर्भांतील अडचणी व उपाययोजना याबाबत खासदार नवनीत राणा यांच्या अध्यक्षतेखाली जिल्हाधिकारी कार्यालयातील बचत भवन येथे आढावा बैठक घेण्यात आली, त्यावेळी त्या बोलत होत्या. यावेळी जिल्हाधिकारी पवनीत कौर यांची प्रमुख उपस्थिती होती.

लोकसभेचे अधिवेशन 7 डिसेंबर 2022 पासून सुरु होत आहे. या पार्श्वभूमीवर केंद्र शासनाकडे अमरावती जिल्ह्याशी संबंधित विषय, त्यातील समस्या व उपाययोजनांबाबत ही बैठक आयोजित करण्यात आली होती.

मुख्य कार्यकारी अधिकारी अविश्यांत पंडा, मनपा आयुक्त प्रवीण आष्टीकर, निवासी उपजिल्हाधिकारी डॉ. विवेक घोडके, रोहयो उपजिल्हाधिकारी राम लंके, महसूल उपजिल्हाधिकारी मनीषकुमार गायकवाड, नगरपालिका जिल्हा प्रशासन अधिकारी गीता वंजारी, मनरेगा उपमुख्य कार्यकारी अधिकारी प्रवीण सिनारे, पाटबंधारे अधीक्षक अभियंता मेघा अक्केवार, प्रकल्प संचालक प्रीती देशमुख, जिल्हा पुनर्वसन अधिकारी सुभाष दळवी, जिल्हा अधीक्षक भूमी अभिलेख स्मिता शहा आदी मान्यवर यावेळी उपस्थित होते.

मेळघाटातील कुपोषणमुक्तीसाठी राबविण्यात येणाऱ्या पोषण आहार योजनेची प्रभावी अंमलबजावणी व आरोग्य सेवेचा दर्जा उंचाविण्यासाठी सर्वच स्तरावरुन प्रयत्न आवश्यक आहे. केंद्र आणि राज्य शासनाची मदत, आरोग्य यंत्रणा, डॉक्टर्स, परिचारिका, स्थानिक नागरिकांच्या मदतीने मेळघाटातील कुपोषण व रक्तक्षयासारख्या समस्या निकाली काढू, असा विश्वास श्रीमती राणा यांनी यावेळी व्यक्त केला.

श्रीमती राणा यांनी जिल्ह्यातील 14 नगरपालिका / नगरपंचायतीमधील पंतप्रधान आवास योजनेबाबत यावेळी आढावा घेतला. त्याबाबतच्या अडी-अडचणी जाणून घेऊन नजीकच्या काळात त्या सोडविण्याची कारवाई करण्याची सूचना संबंधितांना दिली. प्रधानमंत्री आवास योजनेतील घरकुलाच्या हप्त्याबाबत यावेळी चर्चा करण्यात आली. केंद्र शासनाच्या योजनांची अधिक प्रभावीपणे अंमलबजावणी होण्यासाठी करावयाच्या कारवाईबाबत निर्देश देण्यात आले.

केंद्र शासनाच्या योजनांची अंमलबजावणी संदर्भात येणाऱ्या अडी-अडचणी जाणून घेण्यासाठी खासदार श्रीमती राणा यांनी संबंधित विभाग प्रमुखांशी चर्चा केली. जिल्ह्यातील धरण प्रकल्पांची सद्यस्थिती, ग्रामीण व शहरी घरकुल योजना, सिडको विकास आराखडा, प्रधानमंत्री जनविकास योजना, रोजगार हमी योजना तसेच जलजीवन मिशनअंतर्गत येणाऱ्या कामांबाबत चर्चा करुन संबंधितांना योजनांच्या प्रभावी अंमलबजावणीबाबत सूचना दिल्या.

--------------

तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? आम्हास आपल्या परिसरातील बातम्या, लेख अवश्य पाठवा आणि प्रतिनिधी बना ! ताज्या बातम्यांसह अपडेट राहण्यासाठी लाइक करा Gaurav Prakashan फेसबुकपेज !

--------------------

आम्ही तुमच्यासमोर बातम्या, कथा, कविता, वाचनीय लेख अश्या खूप साऱ्या लेखामार्फत भेटत असतो तुम्हाला काय अजून वाचायला आवडेल हे आम्हाला कमेंट मार्फत नक्की कळवा कारण तुमची एक कमेंट आमचे प्रोत्साहन वाढवत असते, तसेच आमचे फेसबुक पेज हि नक्की लाईक करा जेणेकरून तुम्हाला आमच्या सर्व अपडेट मिळतील आणि त्याचबरोबर आमचे फेसबुक पेज शेअर हि नक्की करा धन्यवाद...!

-बंडूकुमार धवणे

संपादक गौरव प्रकाशन

--------------------