Translate

Gaurav Prakashan

Recent in Technology

Advertisement

Breaking News

माझी अमरावती..!

    श्रीकृष्णाची सासूरवाडी
    आपणांस ठाऊक आहे काय?
    लाखांमध्ये एक आहे
    आमची अमरावती माय ||
    भिष्मकाची कन्या रुख्मिणी
    पळवून नेली श्रीकृष्णाने
    मुलाची नाराजी बाजूला ठेवून
    कन्यादान केलं भिष्मकाने ||
    कापूस, ज्वारी, भाज्या अन् कपडा
    दळणवळणाला येथे जाग
    कुणावरही अवलंबून नाही
    अमरावतीचा महसूल विभाग ||
    कपड्यांचा व्यापार इथला
    मनामध्ये घालतो रुंजी
    बिझिलॅंड, सिटीलॅंडला जातांना
    सांभाळाहो आपली पुंजी ||
    अमरावतीच्या तलावाची
    वेगळीच आहे त-हा
    पाऊस लागु नये म्हणून
    छत्रीचा घेतला आसरा ||
    "सरोज" नसता, "प्रभात"
    बोले "चित्राला" एकटं गाठून
    तूच माझी "राजलक्ष्मी",
    तूच माझी "प्रिया"*
    पड़ने नही दूँगा तुझपर
    ई-ऑर्बिट या कार्निवल का साया. ||
    जवाहर रोडच्या विजय क्लॉथला
    गाडगेबाबांचा आशिर्वाद
    गि-हाईकांशी घालत नाही
    कासट सेठ कधीच वाद||
    शेगावीचे गजानन येई
    नित्य खापर्डे कडे
    स्वागता लोटे अमरावती सारी
    शिंपुनी मार्गी सडे ||
    राजकमल आहे अमरावतीला
    परंतु नाही "कमल-राज"
    आमदार-खासदार स्वाभिमानचे
    निमूट चाले कामकाज ||
    आमदार राणा खासदार राणा
    स्वाभिमान हे त्यांचे सूत्र
    चालीसा न म्हणताच पाठविले
    घरीच बसवले पिता-पुत्र ||
    अमरावतीच्या वसतिगृहात
    मिळणार नाही वार्डन
    मात्र सदैव भरले असते
    बांबू, वूड्स अन वढाळी गार्डन ||
    १५ ऑगस्ट ४७ ला स्वतंत्र झाला भारत
    मनामनात जागली खुशी
    भुसारी गेटवर तिरंगा फडकला
    धन्य वीर वामनराव जोशी ||
    तमाम भारतवासीयांनी
    आदर्श हा नक्की घ्यावा
    शिवाजीराव पटवर्धनांची
    तपोवनची कुष्ठसेवा ||
    सोमेश्वर चौक जैन मंदीर
    स्थापिले १०९७ साली
    सव्वा नऊशे वर्ष तारतोय
    आपला आदीनाथ वाली ||
    स्वामी जनार्दनाने घडविली
    आईची मुलांशी गाठ
    एकविरेची मूर्ती स्थापिली
    वर्ष सोळाशे साठ ||
    खापर्डे बगीचाचा पत्ता
    कुणीच नाही विसरले
    पाठकांच्या प्रसुतिगृहात
    कित्येक जीव अंकुरले ||
    अमरावतीचा देव हा
    अनेकांना पावला
    सोमवारी जातात ते
    कोण्डेश्वर महादेवला ||
    कुणालाही विचारा, कुठेही शोधा,
    आख्खा देश फीरा
    भारतात कोठेच मिळणार नाही
    इथला चपराशीपुरा ||
    अमरावतीला मोक्याचे ठिकाणी
    वसलंय कॉंग्रेस नगर
    अन्य पक्षांचे लीडर मात्र
    रहातात इधर-उधर ||
    नगरवाचनालयाची व्याख्यानमाला
    बौद्धीकांचा थाटमाट
    शरीर सौष्ठवासाठी धरा
    ह व्या प्र ची वाट ||
    भानखेड्याला हरीणं आहे
    खोटा आहे हा दावा
    सकाळ-सायंकाळी मालटेकडीवर
    फीरतो त्यांचा 'थवा' ||
    अमरावतीच्या प्रगतीने आता
    पकडली आहे गती
    आम्हास ते लागू नाही
    अति तेथे माती ||
    शेकडो कॉलेज, शेकडो शाळा
    अमरावतीला आता काय उणे?
    उगाच नाही सगळे मानतात
    अमरावतीला विदर्भाचे पुणे ||
    विद्यादानाचे व्रत आहे
    येथील गुरुजनांचे
    विद्या दान करता करता
    शतक उलटले व्ही एम व्ही चे ||
    अमरावतीचा इतिहास जुना
    एकदा करुनच पहा वारी
    शांत, स्वच्छ अन् सोज्वळ भासे
    ही आमची "इंद्रपुरी" ||
    रहिवासी मी अमरावतीचा
    अभिमान बाळगतो उराशी
    एका प्राचीन संस्कृतीची
    हीच मथुरा, अन् हीच काशी.||
    -गणेश जोशी

टिप्पणी पोस्ट करा

0 टिप्पण्या

People

Ad Code