"जागल "

मी एक भारतीय जागल्या

मी जागल करतोय ...

सत्याची , नितीमत्तेची , सत्विचाराची , 

कास्तकारांच्या हक्काची,

आया -बहीणीच्या,लेकी- सुनाच्या इभ्रतेची !

मी जागल करतोय ...!

व-हाडी बोलीभाषेची, मायबोलीची ,

अहिंसेच्या तत्वाची , विज्ञानवादी विचाराची, समता ,स्वातंत्र्य , बंधुता ,न्यायाची अस्मितेची, अस्तीत्वाची, स्वाभिमानाची, देशाच्या संविधानाची, भ्रष्टाचारमुक्त भारताची ..!

मी जागल करतोय ..!

वावरातल्या जेवारीच्या कणसांची,दाण्याची

कापसाची, सोयाबीनची, तुरीची, 

माझी भूक भागवणा-या तमाम सात्वीक पिकांची ,भाकरीची ,

विहीरीच्या पाण्याची , बैलांच्या मेहणतीची , गाई-म्हसी, बक-या-मेंढरायची , मजुरांच्या कष्टाची ,सुपीक- नापीक मातीची ..!

मी जागल करतोय ..!

दिल्लीतून गल्लीत येणा-या प्रत्येक योजनांची , 

सरकारी तिजोरीतल्या प्रत्येक खडकूची, 

फायद्याची- तोट्याची, आल्या-गेल्या  पैस्याची ...!

मी जागल करतोय ...!

विदेशी संस्कृतीपासून -देशी संस्कृतीची, 

चांगल्या -वाईट घटनांची नोंद घेणा-या पेनाची , 

शोषीत , वंचीत, उपेक्षितांच्या अधिकाराकरीता लढणा-या तमाम हातांची ,

अंधारापासून उजेडाची... !

मी जागल करतोय...!

दुर्जनापासून-सज्जनांची ,

हिंसेपासून-अहिंसेची ,

असत्यापासून-सत्याची ,

अनीतीपासून -नीतीची !

अंधा-या रात्री कंदीलाच्या उजेडात

मी रांगडा गडी रानडुकरांना हेरतो ,

ये सी बीच्या जाळ्यात पक्क घेरतो ,

कायद्याच्या गदेघाटात नेऊन कोंडतो !

कास्तकारांना वाकुल्या दाखवणा-या वान्नेरांना गोफणगोटा हाणतो ,

मी माझ्या कष्टाचं, घामाचं ,रगताचं खातो,

हवा पाहून तीवा मांडना-यांची

मी मतदानातून हवा जिरवतो ,

जागल मंजे काय हो ?

जागल म्हंजे...सिमेवर राखण करणं 

जागल म्हंजे...संविधानाची सोकारी करणं 

जागल म्हंजे...जागं राहून आरोळी ठोकणं 

जागल म्हंजे...उपद्रवी जणावरांना घालवनं, लोकशाहीची राखण करणं 

जागल म्हंजे...तमाम पिकांची काळजी घेणं ,

जागल म्हंजे..अन्यायाविरोधात रस्त्यावर लढणं .

आता जागल करायची वेळ आलेली आहे

म्हणून मी रात्रंदिवस चेता राहतो 

होय मी एक भारतीय  ' जागल्या '

मी  ' जागल ' करतोय , आणि तुम्ही ? 

करून बघाना जागल !

तुमच्यासाठी, लेकरांसाठी, समाजासाठी, आणि आपल्या देशासाठी उपद्रवी जणावरांपासून !

अरुण विघ्ने