समाज कल्याण विभागाच्या शासकीय वसतिगृहात प्रवेशासाठी विद्यार्थ्यांनी अर्ज करावे

अमरावती (प्रतिनिधी) : अमरावती विभागातील अमरावती, अकोला, यवतमाळ, बुलढाणा व वाशिम जिल्ह्यातील शैक्षणिक संस्थामध्ये प्रवेश घेतलेल्या अनुसूचित जाती, अनुसूचित जमाती, विमुक्त भटक्या जमाती, इतर मागासवर्ग व विशेष मागास प्रवर्गातील शालेय विद्यार्थी , इयत्ता दहावी व अकरावी उत्तीर्ण तसेच वरिष्ठ महाविद्यालयातील इतर शैक्षणिक/व्यावसायीक अभ्यासक्रमातील प्रथम व ‍द्वितीय वर्षांच्या प्रवेशीत विद्यार्थ्यांना समाज कल्याण विभागाच्या शासकीय वसतिगृहात प्रवेश घेता येईल. त्याप्रमाणे, तालुका स्तरावर मुला/मुलींचे शासकीय वसतिगृहामध्ये इयत्ता आठवी पासुन ते पुढील अभ्यासक्रमाकरिता प्रवेश अर्ज वाटपाची प्रक्रिया सुरु झाली आहे.

शालेय विद्यार्थ्यांसाठी दिनांक 25 जुलै, 2022 इयत्ता दहावी नंतरच्या अभ्यासक्रमामध्ये प्रवेश घेतलेल्या विद्यार्थ्यांसाठी दिनांक 30 जुलै 2022 आणि बी. ए./बी. कॉम/बी.एस.सी अश्या बारावी नंतरचे अभ्यासक्रमांकरिता प्रथम वर्षांचे पदवीका/पदवी, एम.कॉम./एम.एस.सी असे पदवी नंतरचे पदव्युत्तर, अभ्यासक्रम (व्यावसयीक अभ्यासक्रम वगळुन) प्रवेशित विद्यार्थ्यांसाठी अर्ज करण्याची मुदत ही दिनांक 24 ऑगस्ट 2022 पर्यंत आहे. तर व्यावसायिक अभ्यासक्रमास प्रवेश घेतलेल्या विद्यार्थ्यांना दिनांक 30 सप्टेंबर, 2022 पर्यंत अर्ज सादर करता येणार आहे. वसतिगृहातील प्रवेशित विद्यार्थ्यांना शासनाकडून न्याहारी, भोजन, निवासाची सोय, शैक्षणिक साहित्य तसेच निर्वाह भत्ता देण्यात येईल.

विद्यार्थ्यांना ज्या वसतिगृहांत प्रवेश घ्यायचा असेल तेथुनच अर्ज प्राप्त करुन आवश्यक त्या कागदपत्रांसह सादर करावेत. विद्यार्थ्यांनी आपले अर्ज विहीत वेळेत परिपूर्ण माहितीसह संबंधित वसतिगृहातच सादर करावेत. अधिक माहितीसाठी संबंधित शासकीय वसतिगृह तसेच संबंधित जिल्ह्याचे सहायक आयुक्त कार्यालय येथे संपर्क साधावा असे आवाहन श्री. सुनिल वारे, प्रादेशिक उपयुक्त समाज कल्याण विभाग अमरावती यांनी कळविले आहे.