- गौरव प्रकाशन वृत्तसंकलन
अमरावती (प्रतिनिधी) : महानगरपालिकेतर्फे अतिक्रमण निर्मूलन मोहीम राबविण्यात येत आहे. शहरातील काही ठिकाणे गर्दीने फुलतात. त्यामुळे शहरात अतिक्रमण निर्मूलनाची मोहीम राबविण्यात येत आहे. गुरुवार दिनांक २१ जुलै,२०२२ रोजी अतिक्रमण विभागामार्फत पंचवटी चौक ते शेगावं नाका रोडवरील अतिक्रमण निर्मुलनाची कार्यवाही करण्यात आली.
पंचवटी चौक रोड येथून सदर कार्यवाही सुरु करण्यात आली. पंचवटी चौक ते शेगावं नाका रोडच्‍या तसेच विलासनगर रोडवरील दोन्‍ही बाजुंनी सदर अतिक्रमण निर्मुलन व अनधिकृत बांधकाम पाडण्‍याची कार्यवाही करण्यात आली. या कार्यवाही मध्‍ये वालकंपाऊंड, टिनाचे बांधकाम, पानठेले, अनधिकृत दुकाने, दुकानाचे शेड, बॅनर, पोस्‍टर, मुख्य रस्‍त्‍यावरील अतिक्रमण नष्‍ट करुन रोड व फुटपाथ मोकळे करण्यात आले. जेसीपीद्वारे अतिक्रमण निर्मूलनाची कार्यवाही करण्यात आली.
महानगरपालिकेतर्फे अतिक्रमण निर्मूलनाची मोहीम राबविण्याचा निर्णय मनपा आयुक्‍त डॉ.प्रवीण आष्‍टीकर यांनी घेतला. अनधिकृत आणि वाहतुकीस अडथळा करणाऱ्या अतिक्रमणांवर कारवाईची मोहीम सुरू करण्यात आली. सदर कार्यवाही दरम्‍यान अतिक्रमण पथक प्रमुख अजय बन्‍सेले, उपअभियंता प्रमोद इंगोले, अतिक्रमण विभागाची टिम, झोनची टिम व पोलीस अधिकारी व कर्मचारी मोठ्या संख्‍येने उपस्थित होते.
