तो आणि तू सारखेच

तो ही आला आणि गेला

लाखो अस्थी देऊन गेला

हा ही तसाच असल्याचे

सुतोवाच मात्र करून गेला

जा आता तुही विश्राम कर

मलाही स्वल्पाराम घेऊ दे

पोटाची कनगी भरण्यासाठी

भविष्याचा थोडा वेध घेऊ दे

तू आलाच आहेस तर चल

दोघेही सोबत प्रवास करू

एकमेकांचा हातात हात घेत

सुख दुःखांचा डोंगर फिरू

तू एक पाऊल पुढे टाक

मी एक पाऊल टाकतो

दिवस रात्रीच्या श्रमाचा

काळ हिशोब मागतो

गाईच्या गोठ्यातून मी येतो

क्षितीजापल्याडून तू ये

भाकरीचा चंद्र शोधणा-या

उपासी वासराची पूस घे

अरुण विघ्ने