आदर्श ग्राम पुरस्कार

गावात महार ,कुणबी ,ढीवर

इत्यादी लोक आपापल्या मोहल्यात 

सोशल डिसटंगसिंगनुसार

हजारो वर्षांपासून राहतात 

अधूनमधून ठिणग्या उडाल्या गावात

पण सध्या बरं आहे !

गावात येताना दोन-तीन गेट आहेत

गेटच्या बाजूलाच

शासनाच्या तंटामुक्त , हागणदारीमुक्त

अशा पुरस्कारांचे मोठमोठे फलक आहेत.

अलीकडेच गावाला

शासनाचा आदर्श ग्राम पुरस्कार मिळाला

त्याचाही फलक आधीच्याच फलकांपाशी

सरपंचाने लावून घेतला .

काल गावी गेलो

नि त्या नव्या फलकापाशी

नुसताच घुटमळत राहिलो

सेल्फी काढून फेसबुकवर टाकावी

जातीवर नाहीतर फलकावर कविता लिहावी

तिला ' महासत्ता ' वगैरे असंच काहीसं

नाव द्यावं ; असं मनात आलं .

काळ किती वेगानं पुढं गेलाय

मोहल्ले अजूनही एकमेकांपासून दूरच

डोकं खाजवलं

परत परत घुटमळलो

नि वाऱ्याच्या वेगानं

माझ्या शहराकडे निघालो !

-------------------------------------------------------

                       प्रा .डॉ .सुरेश खोब्रागडे

                        लाखनी जि .भंडारा

                         भ्र.९३७३७११४३२

-------------------------------------------------------