आई...

आई आहे तर विश्व भासे सुंदर

आई आहे तर सौख्याचा अंबर ।

आई नाम ईश्वराहून प्रिय ज्यांना

त्यांच्या नामें तिन्ही लोकीं गजर ।।

सदा सर्वदा आई नाम स्मरावे

प्रभात समयी तिचे दर्शन घ्यावे ।

वृद्धाश्रमी तिला स्थान देण्याचे

कधीच ना आपल्या मनी कल्पावे ।।

देव असुनी तो आईविना भिकारी

मग मानवी जीवन आहेच तरी काय? ।

त्यागूनिया मनीच्या अभिमानास

नित्यनेमे स्पर्शावे आपल्या आईचे पाय ।।

प्रेम आईचे आहे सर्वांहूनी पावन

त्रिभुवनाचा स्वामी करतो तिला नमन ।

आईच्या प्रेमाला प्राप्त करण्या

हवेहवेसे वाटते प्रत्येकांना जीवन ।।

ऋण फेडण्या आईच्या दुधाचे

अनंत आयुष्य अपूर्णची वाटे ।

ज्यांना आईचे महत्व कळाले

त्यांना फुलासम वाटे मार्गातील काटे ।।

-अजय रमेश चव्हाण,

तरनोळी

ता.दारव्हा, जि.यवतमाळ

मो.८८०५८३६२०७