"आला पोयाचा सन "

आला पोयाचा गा सन

करा बैलाचा सन्मान

तेल पैसाच्या देठानं 

शेका बयलाचे खान !

लोनी हयदीचा लेप

लावा बैलाच्या खांदाले 

आज आवतन घ्याहो

उद्या येजा जेवानाले !

आना न्हाऊन धुवून

पोटभरून चारून

बांधा चवरं मथाटी

घाला चवाये वरून !

रंग लावून शिंगाले

नक्षीकाम बेगळाचे 

बांधा शिंगाले बाशींग

गळा माळ घुंगराचे !

साज लेऊन नवीन 

बैल झाला नवरदेव

घास पुरनपोयीचा 

खाऊ घाले नामदेव !

त्याले नमन करून

त्याचा उतराई होऊ

सर्जा चालला पोयात

आता तोरनात जाऊ !

तोरनात येकमेका

गयाभेट घेई सारे

बैल मखराचा येता

वाहे अनंदाचे वारे !

सन्मान सोहळा पाहून

आसू डोयातनी येती

कृतज्ञता व्यक्त करी

बैल मालकाच्या प्रती !

- अरूण विघ्ने