एकादशी

येता आषाढ महिना ‌‌|  चार मास चातुर्मास|

एकादशी उपवास | व्रत सर्वश्रेष्ठ||

निघे वारी पंढरीला | रंगे पालखी सोहळा|
जमे भक्तांचा मेळा | पंढरपूरला||

फेर धरती रिंगण | दंग होती वारकरी|
दुमदुमली पंढरी | विठ्ठल नामात||

सुंदर रूप साजरे | गळ्यात तुळशी माळा|
पारणे फिटते डोळा | विठ्ठल सावळा||

टाळ चिपळ्यांचा नाद | हरी नामाचा गजर|
मनी सुखाचा आगर | श्रीहरी दर्शने||

मुखी घेता तुझे नाम | मिळे आत्मा समाधान|
होता चरणाशी लिन | धन्य होतो देह||

आता एकच मागणे | नको मनात स्वार्थता|
नांदो जगी मानवता | सर्वप्रेमभाव ||

- सौ. निशा खापरे
   *नागपूर*