मुंबई : बॉलिवूड अभिनेत्री माधुरी दीक्षित सोशल मीडियावर नेहमीच सक्रिय असते. पण याबाबतीत तिचे पती देखील कमी नाहीत. डॉक्टर श्रीराम नेने सोशल मीडियावर नेहमीच सक्रिय असलेले पाहायला मिळतात. अनेकदा त्यांचे व्हिडीओ आणि सोशल मीडिया पोस्ट व्हायरलही होताना दिसतात. आताही असाच एक व्हिडीओ श्रीराम नेने यांनी शेअर केला आहे. हा व्हिडीओ शेअर करताना त्यांनी मुलगा अरिननं पहिल्यांदाच तयार केलेल्या डिशचे कौतुक केले आहे.
डॉक्टर श्रीराम नेने यांनी त्यांच्या इन्स्टाग्रामवर मुलगा अरिनच्या पहिल्या वहिल्या कुकिंगचा व्हिडीओ शेअर केला आहे. या व्हिडीओमध्ये ते माधुरी दीक्षितसोबत मुलानं तयार केलेला पदार्थ चाखताना दिसत आहेत. तर माधुरी हसताना दिसत आहे. हा व्हिडीओ शेअर करताना डॉक्टर नेने यांनी कॅप्शनमध्ये लिहिलं, बर्‍याच काळानंतर अरिननं पहिल्यांदाच काही तयार केलं आहे, मी त्याने तयार केलेला पदार्थ चाखून पाहिला. या मुलानं तर कमालच केली.
डॉक्टर श्रीराम नेने यांनी कुकिंगची खूप आवड आहे आणि ते नेहमीच किचनमध्ये माधुरीसाठी कोणती ना कोणती स्पेशल डिश तयार करताना दिसतात. आपल्या पतीच्या कुकिंग स्कीलबद्दल बोलताना माधुरी सांगते, जेव्हा मी मोठी होत होते त्यावेळी मी काही पदार्थ बनवायला शिकले होते. मला ऑमलेट, पोहे यांसारखे पदार्थ बनवता येत असत. पण कधी तशी वेळ आलीच नाही. नंतर मी कामाला सुरुवात केली आणि हे सर्व बाजूला पडलं. पण माझ्या पतीला उत्तम जेवण करता येते.
माधुरी पुढे म्हणाली, मी लग्नानंतरच जेवण करायला शिकले. रामसोबत जेव्हा मी अमेरिकेला शिफ्ट झाले तेव्हा त्यांच्याकडे एक फ्रेंच कुक होते. राम त्यांना अस्टिस्ट करत असत आणि असं करता करता त्यांनी सर्व डिश शिकून घेतल्या. आज राम माझ्यापेक्षा उत्तम स्वयंपाक करतात. अर्थात मला काहीच येत नाही असे नाही.
