मुंबई – बॉलिवूडमधील सुपरहिट चित्रपट बाहुबली ने बॉक्स ऑफिसवर कमाईचे अनेक रेकॉर्ड केले. या चित्रपटाच्या दोन्ही भागांनी चित्रपटगृहांत धुमाकूळ घातला होता. बाहुबली: द बिगनिंग आणि बाहुबली: द कनक्ल्युजन या चित्रपटांनी प्रेक्षकांना अक्षरश: वेड लावले होते. चित्रपटात दाखवण्यात आलेली प्रत्येक दृश्य प्रेक्षकांच्या हृदयावर कोरली गेली होती.
चित्रपटातील प्रत्येक पात्राचे प्रेक्षकांनी कौतुक केले. आता या चित्रपटांची पूर्वीची कथा दाखवणारी एक वेबसीरिज नेटफ्लिक्सवर प्रदर्शित होणार आहे. या वेबसीरिजचं नाव बाहुबली: बिफोर द बिगनिंग असून त्याचे चित्रीकरण देखील सुरू झाले आहे. सूत्रांनी दिलेल्या माहितीनुसार या वेबसीरिजचे ७0 टक्के चित्रीकरण पूर्ण करण्यात आले होते. शिवाय चित्रीकरणावर १00 कोटी रुपयांचा खर्चदेखील करण्यात आला होता. परंतु, नेटफ्लिक्सला ही वेबसीरिज न आवडल्याने त्यांनी संपूर्ण सीरिज पुन्हा चित्रित करण्याचे आदेश दिले. शिवाय वेबसीरिजचे बजेटदेखील वाढवून २00 कोटी करण्यात आले.या वेबसीरिजमध्ये काम करणार्‍या पात्रांमध्येही बदल करण्यात आला.
बॉलिवूड अभिनेत्री मृणाल ठाकूर या वेबसीरिजमध्ये महाराणी शिवगामीचं पात्र साकारणार होती. परंतु, तिच्या जागी आता पंजाबी अभिनेत्री वामिका गाबी ही भूमिका साकारणार आहे. वामिका यापूर्वी जब वी मेट, लव्ह आज कल आणि मौसम चित्रपटात झळकली आहे. मृणाल सध्या इतर चित्रपटांच्या चित्रीकरणात व्यग्र असल्याने तिला ही वेबसीरिज करण्यास अडचणी येत होत्या. त्यामुळे तिने वेबसीरिज न करण्याचा निर्णय घेतला. या वेबसीरिजचं चित्रीकरण अत्यंत जोरदार सुरू असून वर्षाच्या शेवटी ही वेबसीरिज प्रेक्षकांना पाहायला मिळू शकते.
