तारक मेहताच्या टीमची चिंता वाढली

मुंबई: बॉलिवूड आणि टीव्ही कलाकारांमध्ये कोरोनाचं संक्रमण दिवसेंदिवस वाढताना दिसत आहे. सेटवर योग्य काळजी न घेतल्यानं किंवा कोरोना नियमांचं काटेकोर पालन न केल्यानं सेलिब्रेटींमध्ये कोरोनाच्या संक्रमणाचं प्रमाण वाढताना दिसत आहे. लोकप्रिय टीव्ही तारक मेहताला सुद्धा याचा फटका बसला आहे. काही दिवसांपूर्वीच या शोमध्ये दयाबेनच्या भावाची भूमिका साकारणार्‍या अभिनेता मयुर वकानी यांनी कोरोना झाल्याचं समोर आलं होतं. त्यानंतर या शोमधील आणखी एका कलाकाराची कोरोना चाचणी पॉझिटिव्ह आल्यानं टीमच्या चिंतेत वाढ झाली आहे.
लोकप्रिय शो तारक मेहतामध्ये भिडेंची भूमिका साकारणारे अभिनेता मंदार चांदवडकर यांना कोरोनाची लागण झाली आहे. मंदार चांदवडकर यांचे कोरोना रिपोर्ट पॉझिटिव्ह आल्यानंतर त्यांनी कुटुंबासह स्वत:ला घरीच क्वारंटाइन करून घेतलं आहे. त्यांच्यावर सध्या घरीच उपचार सुरू आहेत. आपल्याला कोरोनाची लागण झाली आहे मात्र हे एसिप्म्टोमॅटिक असून आपण योग्य ती सर्व काळजी घेत असल्याचं मंदार यांनी सांगितलं.
मंदार चांदवडकर यांनी माध्यमांशी बोलताना सांगितलं की, ह्यमाझे कोरोना रिपोर्ट पॉझिटिव्ह आले आहेत. मात्र त्याआधी मला याची कोणतीही लक्षण दिसली नव्हती. हे एसिप्म्टोमॅटिक आहे. मी योग्य ती सर्व काळजी घेत आहे. मी दिलेल्या सर्व सूचनांचं पालन करत आहे. माझं आरोग्य ठीक आहे. माझे कोरोना रिपोर्ट येण्याआधीच मी स्वत:ला क्वारंटाइन करून घेतलं होतं. कारण मी कोरोना बाधित आहे अशी शंका मला आली होती. माझी फॅमिली सुद्धा क्वारंटाइन असून सर्वजण स्वत:ची काळजी घेत आहेत. मंदार चांदवडकर यांच्या आधी या शोमधील मयुर वकानी यांचे कोरोना रिपोर्ट पॉझिटिव्ह आले होते. त्यांच्यावर सध्या रुग्णालयात उपचार सुरू असून त्यांची प्रकृती स्थीर आहे. दरम्यान मयुर वकानी यांची पत्नी सुद्धा कोरोना संक्रमित आहे. मात्र त्यांना घरीच क्वारंटाइन करण्यात आलं असून त्यांच्यावरही उपचार सुरू आहे. एकमागोमाग एक असे दोन कलाकार करोना संक्रमित झाल्यानं तारक मेहताच्या टीमची चिंता वाढली आहे.

Thank you for reading this post, don't forget to subscribe!