कडक सॅल्युट मेजर….!

Thank you for reading this post, don't forget to subscribe!

मेजर !

आपल्या विभागलेल्या सैन्य तुकड्यांना

जोडण्यात वेळ घालवू नका, मेजर !

शत्रूचे सैन्य सीमापार करीत आहे

ते पहा! त्यांच्या सनातन तोफांचे आवाजही

आपल्याच दिशेने येत आहे मेजर

आपण विभागालो आहोत

निश्चितच विभागालो आहोत

पण, वाकलो नाही, मेजर !

छातीच्या बरगड्या आणि पाठीचा कणा

अजून ताठ आहे, मेजर !

म्हणून बंदुकीचा दस्ता

जमिनीला टेकवून विचार करण्यात अर्थ नाही

आपण हल्ला केलाच पाहिजे

नाहीतर कुठला क्षण

आपल्याला पराभवाचे दान देवून जाईल

याचा नेम नाही, मेजर !

मेजर! शत्रू गुलामीच्या जळत्या घरात राहण्यापेक्षा

त्याच्या विरोधात निष्ठेने लढणाऱ्या

माणसांच्या कहाण्या मी ऐकल्या आहेत, मेजर !

म्हणून आपल्या पराभवानंतर

युध्दविराम होईलच

असं तुम्ही समजू नका

फक्त , आपल्या शहिदत्वाचे रक्त

इथल्या मातीला लागू द्या

म्हणजे झोपडीतला बारुदखाना

आपोआपच उडेल

आणि त्यातूनच आपल्या विजयाचा

नवा इतिहास घडेल !

– सतेश्वर मोरे

अमरावती