श्रमात जगतो.….

मनी एक आशा । तेवत ठेवतो ।

श्रमात जगतो । निरंतर ।।

लेखणीला माझ्या । झुकू देत नाही ।

कधी घेत नाही । मद्य प्याला ।।

सुख जीवनात । नसेल मिळाले ।

विकार जळाले । मात्र माझे ।।

गुरुच्या चरणी । करतो वंदन ।

ठेवतो वदन । प्रफुल्लीत ।।

स्वतःच्या दुःखाला । कशाला दावणे? ।

मरत जगणे । निरर्थक ।।

दुःख लपवून । सुख वाटणारा ।

नित्य हसणारा । खरा नर ।।

स्वतःच्या हिताला । भुलून जगणे ।

दीनास करणे । सहकार्य ।।

हेची माझे कर्म । सत्य माझा धर्म ।

जीवनाचा मर्म । हाच खरा ।।

अजु बोलणार । तसा वागणार ।

नित्य असणार । प्रामाणिक ।।

शब्दसखा-

अजय रमेश चव्हाण,

तरनोळी, ता.दारव्हा,जि.यवतमाळ

मो.८८०५८३६२०७