मुंबई : रणधीर व ऋषी कपूर यांचा धाकटा भाऊ आणि अभिनेते राजीव कपूर यांचे वयाच्या ५८ व्या वर्षी निधन झाले. हृदयविकाराचा झटका आल्यामुळे मंगळवारी (९ फेब्रवारी) त्यांची प्राणज्योत मालवली.
अभिनेत्री नीतू कपूर यांनी सोशल मीडियावर पोस्ट शेअर करत ही माहिती दिली आहे. मंगळवारी सकाळी राजीव कपूर यांना हृदयविकाराचा झटका आला. त्यामुळे त्यांना चेंबूरमधील इनलॅक्स रुग्णालयात दाखल करण्यात आले. मात्र, तेथे त्यांना मृत घोषित करण्यात आले. मी माझा धाकटा भाऊ आज गमावला आहे. आता तो या जगात नाही. डॉक्टरांनी त्याला वाचवण्याचा पूर्ण प्रयत्न केला. मात्र, त्याचे प्राण वाचवता आले नाहीत. मी आता रुग्णालयात आहे आणि त्याचे शव मिळण्याची वाट पाहतोय, अशी पोस्ट रणधीर कपूर यांनी केली आहे. तर रणधीर यांच्याप्रमाणेच नीतू कपूर यांनी देखील राजीव कपूर यांचा फोटो शेअर करत या वृत्ताला दुजोरा दिला आहे. राजीव कपूर यांनी राज कपूर दिग्दर्शिक राम तेरी गंगा मैली या चित्रपटाच्या माध्यमातून कलाविश्‍वात पदार्पण केले होते. त्यानंतर त्यांनी प्रेम ग्रंथ या चित्रपटाचे दिग्दर्शनदेखील केले होते. एक जान हैं हम, राम तेली गंगा मैली, आसमान, लवर बॉय, जबरदस्त, हम तो चले परदेस हे राजीव कपूर यांचे गाजलेले चित्रपट आहे.
