मुंबई : गेल्या काही दिवसांपासून पुन्हा एकदा कोरोनाचा प्रादुर्भाव होऊ लागला आहे. सर्वसामान्यांसोबतच मनोरंजन विश्‍वातील अनेक कलाकारांना करोनाची लागण झाली आहे. सर्वतोपरी काळजी घेऊनही कोरोना होत असल्याने पुन्हा एकदा चिंतेचे वातावरण पसरले आहे. आता छोट्या पडद्यावरील आई कुठे काय करते या लोकप्रिय मालिकेतील संजना अर्थात रुपाली भोसले हिला करोनाची लागण झाली आहे. रुपालीने इन्स्टाग्राम स्टोरीवर पोस्ट शेअर करत ही माहिती दिली आहे.
रुपालीने तिच्या इन्स्टाग्राम स्टोरीवर एक पोस्ट शेअर केली आहे. त्यामध्ये तिने सांगितले आहे की, सर्वप्रकारची काळजी घेऊनही माझी करोना टेस्ट पॉझिटिव्ह आली आहे. मी लवकरच यातून बरी होईन.प्लीज सगळ्यांनी काळजी घ्या. मास्क लावा आणि शक्य असेल तर घरीच रहा.सध्या रुपाली घरीच क्वारंटाईन आहे.
रुपाली आई कुठे काय करते या मालिकेत संजना दीक्षित ही भूमिका साकारत आहे. संजना या भूमिकेमुळे रुपाली घराघरात लोकप्रिय झाली आहे. या मालिकेबरोबरच रुपाली एका नवीन प्रोजेक्टवरही ती काम करत आहे. या प्रोजेक्टसाठी म्हणूनच काही दिवसांपासून मालिकेतून छोटा ब्रेकही घेतला आहे. रुपालीने मालिकेच्या सेटवरून ब्रेक घेतला असला तरी सेटवरच्या प्रत्येक कलाकाराची करोना टेस्ट करण्यात आल्याचे समजते.
